Solapur News : रोहित्र खराब झाल्यास ठेकेदारांकडून ते बदलण्याऐवजी शेतकऱ्यांच्या पैशातून बदलेले जाते. जे शेतकरी पैसे देऊन रोहित्र बदलून घेत नाहीत, अशा शेतकऱ्यांना पंधरा ते वीस दिवस रोहित्र दुरुस्त करून मिळत नसल्यामुळे पिके धोक्यात आली आहेत. यामुळे शेतकऱ्यांचे नुकसान होत असून जनावरांना पिण्याचे पाणीही उपलब्ध होत नाही.

महावितरणकडून शेतकऱ्यांना वीजपुरवठा करताना प्रत्येक दुरुस्तीकामाचा खर्च शेतकऱ्यांवर सोपविला जातो. नव्याने जोडणी देणे असो, की डीपीतील फ्यूज, कटआऊट बदलणे असो, प्रत्येक कामासाठी संबंधित डीपीवरील शेतकऱ्यांना वर्गणी जमा करणे भाग पडत आहे.

नुकतेच वाळूज (ता. मोहोळ) येथील मानेगाव रस्त्यावरील डीपीचे रोहित्र जळून आठवडा उलटला तरीही नवे रोहित्र न बसविल्याने येथील शेतकऱ्यांचे नुकसान होत आहे. या डीपीवर सुमारे दहा शेतकऱ्यांच्या वीजजोडण्या आहेत. कांदा, ऊस, ज्वारी, मका, हरभरा, गहू या पिकांचे विजेअभावी मोठ्या प्रमाणात नुकसान होत आहे.

त्याबरोबरच जनावरांच्या पिण्याच्या पाण्याचा प्रश्न निर्माण झाला आहे. याबाबत संबंधित अधिकाऱ्यांना प्रतिक्रिया विचारण्यासाठी संपर्क साधण्याचा प्रयत्न केला असता प्रतिसाद मिळाला नाही.