Jalgaon News : खानदेशात कमाल तापमान सतत वाढत आहे. यामुळे केळीसह पपई, कलिंगड, खरबूज, भाजीपाला पिकांना फटका बसत आहे. पिकांना मुबलक पाणी देवूनही पिके माना टाकत आहे.

निसवलेल्या किंवा काढणीवर असलेल्या ज्या केळी बागांत प्लॅस्टिक मल्चिंग आहे, त्या बागांत झाडे मोडण्याचा, घट सटकून नुकसानीची समस्या अधिक आहे. जळगाव, धुळे व नंदुरबारात तापमान सतत वाढले आहे. कमाल तापमान मध्यंतरी ४४ अंश सेल्सिअसपर्यंत पोहोचले होते. सध्यादेखील तापमान ४३ अंश सेल्सिअसपर्यंत नोंदविले जात आहे.

सकाळी नऊ ते रात्री नऊपर्यंत उष्णता असते. उष्ण झळांमुळे पिकांची अन्नद्रव्य ग्रहण क्षमता खालावली आहे. पीकवाढीवर परिणाम होत आहे. केळीसह पपई, भाजीपाला, कलिंगड पिकांना मोठा फटका बसत आहे. कलिंगडाची फळे होरपळून पिवळी, काळी पडत आहेत. ती खरेदीस व्यापारी नकार देत आहेत.

गिरणा पट्टा, अनेर नदीचा भाग, पांझरा नदीचे क्षेत्र व सातपुड्याच्या पायथ्याशी असलेल्या सर्वच परिसरात पपई, भाजीपाला, केळी पिकविणाऱ्या शेतकऱ्यांचे प्रमाण मोठे आहे. शेतकरी काही दिवसांपासून केळीचे खोड लागवड करण्यापासून त्याची रासायनिक व सेंद्रिय खते देऊन त्याचे पालन पोषण करीत आहेत.

केळी पिकाच्या माध्यमातून शेतकऱ्यांचे आर्थिक प्रश्‍न मार्गी लागतात. मात्र यंदा वाढलेल्या तापमानामुळे पपई, कलिंगड, बागा जळत आहेत. यामुळे शेतकऱ्यांचे मोठे आर्थिक नुकसान होत आहे. परिसरात केळीची लागवड मोठ्या प्रमाणात झाली आहे. सध्या पारा ४० ते ४५ अंशांपर्यंत गेला आहे व हवेत प्रचंड उष्णतेची लाट निर्माण झाली आहे.

नुकसान वाढतेच

वाऱ्यामुळे पपई, कलिंगड, केळीची पाने पूर्णतः फाटत आहेत. उष्णतेमुळे संपूर्ण केळीबागा जळताना दिसत आहेत. यात विहिरी व कूपनलिकांची पाणी पातळी खोल जात असल्याने पिकाला पाणी देणे अनिश्‍चित झाले आहे.

पिकला पाणी कमी पडल्यामुळे पिके जळू लागली आहेत. शेतकऱ्यांनी काढलेला या वर्षीचा फळपीक विम्यासाठी ते उष्णतेच्या निकषात पात्र ठरत असून, लवकरात लवकर विमा कंपनीने केळी पिकाचा पंचनामा करून नुकसानभरपाई देण्याची मागणी परिसरातील शेतकऱ्यांनी केली आहे.