Pune News : लाखणगाव (ता. आंबेगाव) परिसरातील पिके पाण्याअभावी करपू लागले आहे. वीस ते पंचवीस दिवसांपासून डिंभे धरणाच्या उजव्या कालव्यातून पाणी वाहत आहे. पाणी शिरूर तालुक्यातून सोलापूर जिल्ह्याच्या हद्दीपर्यंत गेले. परंतु तालुक्यातील शेतकऱ्यांना अजून हे पाणी मिळाले नाही.

पूर्वभागातील गावांना तातडीने पाणी सोडावे. येत्या २४ तासांच्या आत पाणी सोडले नाही तर शेतकऱ्यांना घेऊन पाटबंधारे विभागाच्या कार्यालयासमोर बेमुदत आंदोलन केले जाईल, असा इशारा स्वाभिमानी शेतकरी संघटनेचे पुणे जिल्हा अध्यक्ष प्रभाकर बांगर यांनी दिला आहे.

लाखणगाव परिसरातील शेतकऱ्यांची पिके करपून जाऊ लागली आहे. काहींची पिके जळाली आहे. वारंवार शेतकऱ्यांनी मागणी करून देखील पाटबंधारे विभागाकडून फक्त आश्वासने दिली गेली परंतु पाणी मात्र शेतकऱ्यांना मिळाले नाही. पिके पूर्णपणे जळून गेल्यामुळे येथील शेतकऱ्यांचे मोठे नुकसान झाले आहे.

या भागातील गणेश दौंड, युवराज टाकळकर, शिवम रोडे, राहुल पाचारणे, आनंदराव दौंड, प्रवीण पाचरणे, मारुती भागवत, किसन दौंड यासह अनेक शेतकऱ्यांची पिके करपून गेल्यामुळे शेतकऱ्यांचे नुकसान झाले आहे.

संबंधित शेतकऱ्यांनी स्वाभिमानी शेतकरी संघटनेचे पुणे जिल्हा अध्यक्ष प्रभाकर बांगर यांच्याकडे आपले गाऱ्हाणे मांडले. त्यानंतर प्रभाकर बांगर यांनी पाटबंधारे विभागाच्या अधिकाऱ्यांशी संपर्क साधून तातडीने पाणी सोडण्याची मागणी केली व बेमुदत आंदोलनाचा इशारा दिला.