Akola News : अकोला जिल्ह्यात अतिवृष्टीमुळे नुकसान झालेल्या शेतकऱ्यांना भरपाई मिळावे, या मागणीसाठी शिवसेना (ठाकरे) आक्रमक झाली. शिवसैनिकांनी आज कौलखेड भागात असलेले पीकविमा कंपनीच्या कार्यालयाची तोडफोड केली.

अकोला जिल्ह्यात जुलै महिन्यात झालेल्या अतिवृष्टीमुळे शेत जमीन खरवडून गेली आहे. या नुकसानीची भरपाई म्हणून राज्य शासनाने हेक्टरी १३ हजार ६०० रुपये देण्याची यावी. तसेच त्यानंतर पडलेल्या पावसाच्या खंडामुळे सोयाबीन, कापूस पिकांचे नुकसान झाले आहे. या मागणीसाठी शिवसेना जिल्हाप्रमुख गोपाल दातकर यांनी दोन दिवसांपासून अकोला येथे अन्नत्यात आंदोलन सुरू केले आहे.

पीकविम्याबाबत सरकारच्यावतीने अधिसूचना काढूनही दिवाळीपूर्वी शेतकऱ्यांच्या खात्यात भरपाई जमा न झाल्याने शिवसैनिक संतप्त झाले. त्यांनी आज कौलखेड येथील एसडीएफसी अॅग्रो या पीकविमा कंपनीच्या कार्यालयात तोडफोड केली. संतप्त शिवसैनिकांनी घोषणाबाजी करीत कार्यालयातील साहित्याची तोडफोड केली.