Vikramgad News : तालुक्यात नवरात्रोत्सवानंतर हळवे भातपीक तयार झाल्याने कापणीला जोर पकडला होता; मात्र गेल्या एका आठवड्यापासून संध्याकाळच्या सुमारास विजेच्या गडगडाटात जोरदार वाऱ्यासह परतीचा पाऊस जोरदार बरसू लागल्याने अनेक शेतकऱ्यांचे मोठे नुकसान झाले होते.

नुकसान झालेल्या पिकाचे पंचनामे करण्याची मागणी केली होती. त्यानुसार तालुक्यात भातपिकाचे पंचनामे करण्याचे आदेश विक्रमगड तहसील कार्यालयाकडून देण्यात आले आहेत.

विक्रमगड तालुक्यात १२ ते १९ ऑक्टोबरदरम्यान रोज संध्याकाळी अचानक विजेच्या गडगडाटासह परतीच्या पावसाच्या जोरदार सरी बरसू लागल्या होत्या. याचा परिणाम तयार झालेल्या कापणी केलेल्या भातपिकावर झाला असून मोठ्या प्रमाणात नुकसान झाल्याचा प्राथमिक अंदाज व्यक्त करण्यात आला आहे.

यामध्ये स्थानिक प्रशासनाकडून नुकसान झालेल्या भातपिकाचे पंचनाम्याच्या कामास सुरुवात झाली आहे. ग्रामपातळीवर ग्रामपंचायत अधिकारी (ग्रामसेवक), कृषी अधिकारी, तसेच तलाठी यांच्यामार्फत पंचनामा सुरू करण्यात आले आहेत. तालुकास्तरावर तहसीलदार, गटविकास अधिकारी, तसेच तालुका कृषी अधिकारी यांच्यामार्फत पंचनाम्याचा अहवाल येत्या काही दिवसांत सरकारकडे सादर होणार आहेत.

आवश्यक कागदपत्रे

आधार कार्ड

बँक पासबुक

सात-बारा

नुकसानीचा फोटो

शेतकरी मयत असल्यास

त्याच्या वारसाची कागदपत्रे.