Yavatmal News : पुसद तालुक्यात २७ व २८ रोजी झालेल्या मॉन्सूनोत्तर पावसामुळे सुमारे ३० हजार हेक्टर क्षेत्रावरील कापूस, तूर, हरभरा, गहू व केळी पिकांचे नुकसान झाले. तहसीलदार व कृषी विभागाने नजर अंदाज नुकसानीचा अहवाल जिल्हाधिकारी यांच्याकडे सादर केला आहे.

पुसद तालुक्यात दोन दिवस झालेल्या जोरदार अवकाळी पावसामुळे उभ्या पिकांना मोठा फटका बसला आहे. वीज पडून चिखली येथे एक बैल ठार झाला, तर शेंबाळपिंपरी येथे पाच मेंढ्या वीज कोसळल्याने ठार झाल्या. तालुक्यातील १८९ गावे अवकाळी पावसाने बाधित झाले.

एकूण १९ हजार ५९६ हेक्टर क्षेत्रावरील कापूस पिकांचे नुकसान झाले. त्या खालोखाल तूर पिकाला फटका बसला. एकूण चार हजार ५७१ हेक्टर क्षेत्रातील तूर पीक पावसाच्या तडाख्यामुळे जमिनीवर लोळले. एकूण तीन हजार ७०६ हेक्टर क्षेत्रातील हरभरा पिकाचे नुकसान झाले.

एकूण दोन हजार ३४० हेक्टर क्षेत्रावरील गहू पिकांचे नुकसान झाले आहे. तसेच पाच हेक्टर क्षेत्रातील केळी पिकाला फटका बसला आहे. सोमवारी (ता. २७) ४८.९ मिलिमीटर व मंगळवारी ५७ मिलिमीटर पाऊस झाला. दोन दिवसांत एकूण १०५.९ मिलिमीटर पावसाची नोंद करण्यात आली.

आमदारद्वयांनी घेतली जिल्हाधिकाऱ्यांची भेट

पुसद विधानसभेचे आमदार इंद्रनील नाईक व विधानपरिषद सदस्य नीलय नाईक यांनी तातडीने जिल्हाधिकारी डॉ. आशिया व मुख्य कार्यकारी अधिकारी डॉ. मैनाक घोष यांची भेट घेऊन शेती पिकांचे झालेल्या नुकसानीचे पंचनामे करण्यात यावे, अशी मागणी केली. त्यावर जिल्हाधिकाऱ्यांनी तातडीने पावले उचलण्याचे आश्वासन दिले.