Kolhapur News : टस्कराने घाटकरवाडी पैकी डोंगरवाडीच्या जंगल भागात मुक्काम वाढवला आहे. दरवर्षी सुगीच्या दिवसात येणारा हा पाहुणा यंदा देखील या परिसरात दाखल झाला आहे.

हाता तोंडाशी आलेले भात, नागलीची पीक तो फस्त करीत आहे. पावसाच्या दणक्यात थोडीफार वाचलेली पिकेही हातची जाणार असल्याने शेतकरी अस्वस्थ झाला आहे.

तक्रार करूनही वन विभागाकडून दखल घेतली जात नसल्याचे शेतकरी सांगत आहेत. चाळोबाच्या जंगलातून टस्कर दरवर्षी सुगीच्या दिवसात येतो. यंदाही तो दाखल झाला आहे. येथे तो बिनधास्तपणे वावरत आहे.

आंबोलीला भिडलेल्या सह्याद्रीच्या उपरांगेमध्ये आजरा तालुक्याचे शेवटचे टोक घाटकरवाडी, धनगरमोळा व किटवडे परिसर आहे. या परिसरातील जंगलात टस्कर वावरत असून सायंकाळी तो धनगरबाडी तलावात उतरतो.

तेथे मनसोक्त डुंबल्यानंतर शेतात उतरून पिकांचे नुकसान करतो. सुगीच्या दिवसात त्याचे आगमन झाल्याने शेतकरी अस्वस्थ झाला आहे. हातातोंडाशी आलेले भात, नागलीचे पीक फस्त करीत आहे.

तुडवूनही त्याच्याकडून नुकसान होत आहे. त्याचा बंदोबस्त करावा, अशी मागणी शेतकरी करीत असून त्याकडे वन विभागाकडून गांभिर्याने लक्ष दिले जात नसल्याचे शेतकरी सांगत आहेत.