अॅग्रोवन वृत्तसेवा
Solapur News : सोलापूर ः पुण्यश्लोक अहिल्यादेवी होळकर सोलापूर विद्यापीठातील भूशास्त्र संकुल आणि केगाव येथील एन. बी. नवले सिंहगड अभियांत्रिकी महाविद्यालयाच्या सेंटर फॉर रिसर्च अॅण्ड टेक्नॉलॉजी डेव्हलपमेंट यांच्या संयुक्त विद्यमाने १६ ते १९ फेब्रुवारी २०२४ या कालावधीत रेशीम उत्पादन व अत्याधुनिक तंत्रज्ञान या विषयाशी निगडीत ‘ए मल्टी मेगा इव्हेंट ऑन इनोव्हेटिव्ह टेक्नॉलॉजीज फॉर विकसित भारत’चे आयोजन करण्यात आल्याची माहिती विद्यापीठाचे कुलगुरू प्रा. डॉ. प्रकाश महानवर यांनी पत्रकार परिषदेत दिली.

डॉ. महानवर म्हणाले, या आंतरराष्ट्रीय कार्यक्रमांमुळे सिल्क सायन्स व टेक्नॉलॉजीला नवा आयाम मिळणार असून नवसंशोधकांसाठी, शेतकऱ्यांसाठी, विद्यार्थ्यांसाठी, नवउद्योजकांसाठी हा कार्यक्रम पर्वणी ठरणार आहे.

याअंतर्गत सिल्क फाईब्रॉईन याविषयावर आधारित आंतरराष्ट्रीय परिषद, विद्यार्थ्यांसाठी प्रश्नमंजूषा, सिल्क सायन्स या विषयावर प्रदर्शन ‘डिस्टा २०२४’ या तांत्रिक स्पर्धेचे आयोजन या निमित्ताने केले जाणार आहे.

कार्यक्रमाच्या यशस्वितेसाठी विविध समित्या बनविण्यात आल्या आहेत. या आंतरराष्ट्रीय परिषदेसाठी विविध देश, राज्यांतून संशोधक व उद्योजक उपस्थित राहणार आहेत.

यासाठी आर्थिक साहाय्य विविध शासकीय निमशासकीय विभाग तसेच सामाजिक संस्था उद्योग समूह यांच्यामार्फत होणार आहे. या आंतरराष्ट्रीय परिषदेसाठी उद्योजकांनी व सामाजिक स्वयंसेवी संस्थांनी सहकार्य करावे, असेही ते म्हणाले.

...म्हणून ही परिषद महत्त्वाची
‘सीआरटीडी’चे संचालक व डी. वाय. पाटील विद्यापीठाचे माजी कुलगुरू डॉ. शिवाजी पवार यांनी सांगितले की, रेशीम कोळी व रेशीम किडे यापासून मिळणारे रेशीम म्हणजेच सिल्क हे पदार्थविज्ञान संशोधनासाठी महत्त्वाचा घटक असल्याचे संशोधनातून सिद्ध झाले आहे,

सिल्क हे प्रोटिन्सने समृद्ध असल्यामुळे व त्याच्या असलेल्या विशिष्ट जैवगुणधर्मामुळे ते इतर पॉलिमर्सपेक्षा सरस ठरते, त्यादृष्टीने ही परिषद महत्त्वाची आहे, असेही ते म्हणाले.