Yavatmal News : कापूस उत्पादक पणन महासंघाची निवडणूक बिनविरोध करण्याची रणनीती चार विभागांत फसली आहे. नागपूर, वणी, नांदेड या तीन विभागांसह ओबीसी राखीव प्रवर्गात लढत होणार असून, १३ संचालकांची बिनविरोध निवड झाली आहे.

कापूस उत्पादक पणन महासंघाची निवडणूक रणधुमाळी सुरू झाली आहे. उमेदवारी अर्ज मागे घेण्याचा शुक्रवार (ता. २२) हा अखेरचा दिवस होता.

निवडणूक न होता बिनविरोध निवडीसाठी संचालकांचे प्रयत्न होते. १७ पैकी १३ ठिकाणी संचालकांचे प्रयत्न यशस्वी झाले आहे. चार ठिकाणी तडजोड न झाल्याने या विभागात निवडणूक होऊ घातली आहे. पणन महासंघाच्या ११ विभागांपैकी पाच विभाग आधीच बिनविरोध झाले होते. उमेदवारी अर्ज मागे घेतल्यानंतर आठ विभागही बिनविरोध झाले आहे.

सूतगिरणी मतदार संघातून आमदार कुणाल पाटील, अमरावती विभागातून माजी अध्यक्ष अनंतराव देशमुख, खामगाव धृपतराव सावळे, यवतमाळ प्रफुल्ल मानकर, अनुसूचित जाती, जमाती मतदारसंघातून माजी संचालक सुरेश चिंचोळकर, विमुक्त भटक्या जाती जमाती राजकिशारे मोदी, महिला राखीव उषा शिंदे, सुनीता अळसपुरे यांची बिनविरोध निवड झाली.

नागपूर विभागात माजी आमदार सुरेश देशमुख व रमेशचंद्र बंग अशा दोन दिग्गजांचे उमेदवारी अर्ज कायम आहेत. नांदेड विभागात राजेंद्र केशवे, मोहन पाटील यांच्यात लढत होणार आहे. वणी विभागात सुभाष खाडे व चंद्रपूरचे आमदार सुभाष धोटे यांचे बंधू शेखर धोटे यांच्यात थेट लढत होणार आहे. त्यामुळे आता निवडणुकीत कोण बाजी मारणार, याकडे राज्याचे लक्ष लागले आहे.

ओबीसी प्रवर्गात तिहेरी लढत

पणन महासंघाच्या निवडणुकीत सर्वाधिक उमेदवारी अर्ज इतर मागास प्रवर्गातून दाखल झाले होते. दहा जणांनी उमेदवारी दाखल केली होती. त्यामुळे उमेदवारी मागे घेण्यासाठी नेत्यांना चांगलीच दमछाक झाली. सात उमेदवारांनी नामांकन मागे घेतले असून, अजूनही तीन उमेदवार कायम आहेत. त्यात खामगावचे माजी संचालक प्रसेनजित पाटील, लातूरचे भरत चामले व जळगावचे चंद्रकांत बाविस्कर रिंगणात कायम आहेत.