Solapur News : पंतप्रधान सूर्यघर मोफत वीज योजनेची घराघरांत पोहोचविण्यासाठी महावितरणकडून चित्ररथ तयार करण्यात आला असून, जिल्हाधिकारी कुमार आशीर्वाद व महावितरणचे कार्यकारी संचालक (विशेष योजना) धनंजय औंढेकर यांच्या हस्ते हिरवा झेंडा दाखवून हा चित्ररथ जिल्ह्यात मार्गस्थ झाला.

अक्षय ऊर्जेचा स्रोत असलेल्या सूर्यापासून मिळणाऱ्या सौर विजेच्या प्रत्येक कुटुंबाला विजेच्या बाबतीत स्वयंपूर्ण करण्यासाठी केंद्र सरकारने ‘पंतप्रधान सूर्यघर-मोफत वीज योजना’ जाहीर केली आहे. या योजनेच्या माध्यमातून कुटुंबांना आपल्या वीजबिलात शंभर टक्क्यांपर्यंत बचत करता येईल,

तसेच शिल्ल्क वीज महावितरणला देऊन अतिरिक्त उत्पन्न मिळवता येईल. तर दुसरीकडे मुख्यमंत्री सौर कृषिपंप योजनेच्या माध्यमातून शेतकऱ्यांना दिवसा व मोफत वीज मिळेल. या दोन्ही योजनांचा फायदा घरगुती व शेतकरी ग्राहकांनी घ्यावा, असे आवाहन जिल्हाधिकारी कुमार आशीर्वाद यांनी केले आहे.

या वेळी महावितरणचे कार्यकारी संचालक (विशेष योजना) धनंजय औंढेकर, अधीक्षक अभियंता सुनील माने, कार्यकारी अभियंता आशिष मेहता व कार्यकारी अभियंता रमेश राठोड, अतिरिक्त कार्यकारी अभियंता राजेश मदने यांच्यासह महावितरणचे वरिष्ठ अधिकारी उपस्थित होते.

पंतप्रधान नरेंद्र मोदी यांच्या अध्यक्षतेखालील केंद्रीय मंत्रिमंडळाने छतांवर सूर्यघर योजनेसाठी १ कोटी सूर्यघरांचे लक्ष ठेवले आहे. या योजनेअंतर्गत एक किलोवॅटसाठी ३० हजार, २ किलोवॅटसाठी ६० हजार तर ३ किलोवॅट व त्यापुढील क्षमतेच्या सौरप्रकल्पासाठी ७८ हजारांचे अनुदान दिले जाणार असल्याची माहिती महावितरणचे कार्यकारी संचालक धनंजय औंढेकर यांनी दिली.

पीएम-सूर्य घर मोफत वीज योजना, पीएम कुसुम सोलार, मुख्यमंत्री सौर कृषिपंप योजना यासह अन्य सौर योजनांबाबत कार्यकारी संचालक धनंजय औंढेकर यांनी महावितरणच्या सर्वच कार्यालयातील वरिष्ठ अधिकाऱ्यांच बैठक घेतली.