Nagar News : महाराष्ट्र राज्य अंगणवाडी कृती समितीच्या वतीने अंगणवाडी सेविकांनी (Anganwadi Sevika)आपल्या विविध मागण्यांसाठी राज्यभरात सोमवारपासून (ता. २०) बेमुदत संप सुरू आहे.

शुक्रवारी (ता.२४) संपाच्या पाचव्या दिवसांपर्यंत कोणताही तोडगा निघाला नाही. परिणामी, हा संप सुरूच आहे.

जिल्ह्यातील साडेनऊ हजार अंगणवाडी सेविका, मदतनीस या संपात सहभागी असल्याने, गेल्या पाच दिवसांपासून जिल्ह्यातील लाखो बालके पोषण आहारापासून वंचित आहेत.

वेतनश्रेणी लागू करणे किंवा मानधनात वाढ करणे, पेन्शन लागू करणे आदी प्रमुख मागण्यांसाठी २० फेब्रुवारीपासून महाराष्ट्रात अंगणवाडी कर्मचारी संघटनांच्या कृती समितीने अंगणवाडी सेविका-मदतनीस यांचा बेमुदत राज्यव्यापी संप पुकारला आहे.

तालुका, जिल्हा, तसेच राज्य पातळीवर अंगणवाडी सेविकांकडून दररोज निदर्शने, मोर्चे सुरू आहेत. परंतु अद्यापि शासनाने यावर तोडगा काढला नाही. यापूर्वी २०१४ मध्ये ४५ दिवस व २०१७ मध्ये ४० दिवस अंगणवाडी सेविकांचे आंदोलन सुरू होते.

त्यामुळे आता आणखी किती दिवस हे आंदोलन सुरू राहणार, याकडे लक्ष लागले आहे. नगर जिल्ह्यात एकूण ५ हजार ६३४ लहान-मोठ्या अंगणवाड्या आहेत.

यात ४ हजार ५९५ अंगणवाडी सेविका, ८१६ मिनी सेविका, तर ४ हजार १४२ मदतनीस असे एकूण साडेनऊ हजार कर्मचारी आहेत. हे सर्व जण बेमुदत संपात सहभागी असल्याने अंगणवाड्यांना सोमवारपासून कुलूप आहे.