Dharashiv News : जिल्ह्यात सप्टेंबरमध्ये अतिवृष्टीमुळे झालेल्या पिकांच्या नुकसानीची भरपाई लवकरच मिळण्याची संकेत मिळत आहेत. विभागीय आयुक्तांनी भरपाईच्या निधी मागणीसाठी पाठवलेल्या प्रस्तावाला मुख्य सचिवांनी मंजुरी दिली असून विधानसभा निवडणुकीच्या आचारसंहितेमुळे मंजूर भरपाईचे वाटप करण्याची परवानगी मुख्य निवडणूक अधिकाऱ्यांकडे मागितली आहे.

ही परवानगी मिळताच जिल्ह्यातील शेतकऱ्यांना भरपाईचे वाटप सुरू होणार, असल्याची माहिती सूत्रांनी दिली. जिल्ह्यात सप्टेंबरमध्ये झालेल्या अतिवृष्टीमुळे खरिपातील पिकांचे मोठे नुकसान झाले. जिल्हा प्रशासनाने नुकसानीचे पंचनामे केल्यानंतर एक लाख ८० हजार ७८६ शेतकऱ्यांचे एक लाख ६३ हजार ९७ हेक्टरवरील पिकांचे ३३ टक्क्यांपेक्षा जास्त नुकसान झाल्याची माहिती समोर आली.

या शेतकऱ्यांना राष्ट्रीय आपत्ती प्रतिसाद निधी (एनडीआरएफ) व राज्य आपत्ती प्रतिसाद निधीच्या (एसडीआरएफ) निकषानुसार हेक्टरी १३ हजार आठशे रुपयांप्रमाणे भरपाईसाठी २२१ कोटी ८१ लाख तीस हजार ८० रुपये निधी मागणीचा प्रस्ताव जिल्हाधिकाऱ्यांनी चार ऑक्टोबरला विभागीय आयुक्तांकडे पाठवला होता.

आयुक्तांनी तातडीने तो प्रस्ताव सरकाला सादर केल्यानंतर विधानसभा निवडणुकीची आचारसंहिता लागू झाली. यामुळे या प्रस्तावाला मुख्य सचिवांनी मंजुरी दिली असून निवडणूक आयोगाकडून भरपाईचे वाटप करण्यासाठी परवानगी मागितली आहे.

मुख्य निवडणूक अधिकाऱ्यांकडून लवकरच परवानगी मिळण्याची आशा प्रशासनाला आहे. दरम्यान ५७ पैकी ३६ मंडळात अतिवृष्टी झाली असून अतिवृष्टी न झालेल्या तालुक्यात पुरामुळे पिकांचे मोठे नुकसान झाले आहे.

या पिकांच्या पंचनामे करण्यासाठी जिल्हा प्रशासनाने निवडणूक आयुक्तांकडे परवानगी मिळण्याबाबत प्रस्ताव पाठवला आहे. दरम्यान ऑक्टोबरमध्ये अतिवृष्टीमुळे झालेल्या नुकसानीच्या भरपाईबाबत अजून काहीच हालचाल नसल्याचे चित्र आहे.