Parbhani News: राज्यातील चार कृषी विद्यापीठांच्या ५३ व्या ‘संयुक्त कृषी संशोधन विकास समिती बैठक - २०२५’चे (जॉइंट ॲग्रेस्को) आयोजन गुरुवार (ता. २९) ते शनिवार (ता. ३१) या कालावधीत वसंतराव नाईक मराठवाडा कृषी विद्यापीठामध्ये करण्यात आले आहे. यामध्ये चार विद्यापीठांचे ३६ पिकांचे वाण, २१ अवजारे, २४७ तंत्रज्ञान शिफारशींचे सादरीकरण करण्यात येणार आहे. मुख्यमंत्री देवेंद्र फडणवीस यांच्या हस्ते गुरुवारी (ता. २९) सकाळी ११ वाजता ‘जॉइंट ॲग्रेस्को’चे उद्‍घाटन होणार आहे, अशी माहिती जॉइंट ॲग्रेस्कोचे स्वागताध्यक्ष कुलगुरू डॉ. इंद्र मणी मिश्रा यांनी सोमवारी (ता. २६) पत्रकार परिषदेत दिली.

या कार्यक्रमात विकसित कृषी संकल्प अभियानचेदेखील उद्‍घाटन होणार आहे. डॉ. इंद्र मणी म्हणाले, की चारही कृषी विद्यापीठांनी केलेले संशोधन शेतकऱ्यांपर्यंत पोहोचविण्‍यासाठी महत्त्वाचा टप्‍पा मानल्‍या जाणाऱ्या यंदाच्या जॉईंट ॲग्रेस्कोचे आयोजन परभणी कृषी विद्यापीठ व महाराष्ट्र कृषी शिक्षण संशोधन परिषद यांच्यातर्फे करण्यात आले आहे.

उद्‍घाटनास उपमुख्यमंत्री एकनाथ शिंदे, उपमुख्यमंत्री अजित पवार यांची प्रमुख उपस्थिती राहणार आहे. अध्‍यक्षस्‍थानी कृषिमंत्री तथा विद्यापीठाचे प्रतिकुलपती माणिकराव कोकाटे असणार आहेत. पशुसंवर्धन, पर्यावरण आणि हवामान बदलमंत्री पंकजा मुंडे, पालकमंत्री मेघना साकोरे-बोर्डीकर, कृषी राज्यमंत्री आशिष जयस्वाल, कृषी परिषदेचे उपाध्यक्ष तुषार पवार, प्रधान सचिव (कृषी) विकासचंद्र रस्तोगी, कृषी परिषदेचे महासंचालक रावसाहेब भागडे, कृषी आयुक्त सूरज मांढरे, कृषी विद्यापीठांचे कुलगुरू, कार्यकारी परिषदेचे सदस्य, कृषी परिषद, कृषी विद्यापीठांचे सर्व संचालक, तीनशे ते चारशे शास्त्रज्ञ उपस्थित राहणार आहेत.

‘जॉइंट ॲग्रेस्को’मध्ये वनामकृविचे आंबा, तीळ, ज्वारी, राजमा या ४ पिकांचे वाण, १ अवजार, ५३ शिफारशींसह चार कृषी विद्यापीठांचे एकूण ३६ वाण, २१ अवजारे, २४७ तंत्रज्ञान शिफारशी सादर होणार आहेत. या शिफारशींवर विचारमंथन होऊन शेतकऱ्यांसाठी प्रसारित करण्यासाठी अंतिम मान्यता देण्यात येणार आहे. आयसीएआरअंतर्गत नऊ संशोधन संस्था, विविध विभाग, कृषी विद्यापीठातील संशोधन संचालक अहवाल तसेच राष्‍ट्रीय पातळीवरील शास्‍त्रज्ञांचे विशेष सादरीकरण होणार आहे.

विकसित कृषी संकल्प अभियानाचे उद्‍घाटन

केंद्रीय कृषी व शेतकरी कल्याण आणि ग्रामीण विकास मंत्रालयातर्फे गुरुवार (ता. २९) ते १२ जून या कालावधीत देशभरात आयोजित विकसित कृषी संकल्प अभियानचे उद्‍घाटन गुरुवारी (ता. २९) परभणी कृषी विद्यापीठात मुख्यमंत्री देवेंद्र फडणवीस यांच्या हस्ते होणार आहे. राज्यात हे अभियान कृषी विभाग आणि ५० कृषी विज्ञान केंद्रांच्या माध्यमातून ४ हजार ५०० गावांत तर मराठवाडा विभागात १२ कृषी विज्ञान केंद्रांच्या माध्यमातून १ हजार ८० गावांमध्‍ये राबविण्‍यात येणार आहे‌, असे डॉ. इंद्र मणी यांनी सांगितले.