Akola News: खरीप हंगाम जवळ आला असून, शेतकऱ्यांनी आगामी काळाचे नियोजन म्हणून रासायनिक खतांचा साठा करण्यास सुरुवात झाली आहे. मात्र काही ठिकाणी डीएपी (डाय-अमोनियम फॉस्फेट) खतासमवेत सल्फर खताची लिंकिंग केली जात असल्याने शेतकऱ्यांमधून नाराजी व्यक्त होत आहे. दुसरीकडे शासकीय यंत्रणा, अशा प्रकारच्या लिंकिंगबाबत शेतकऱ्यांनी तक्रार दिल्यास, कायदेशीर कारवाई करू, असे आश्‍वासन शेतकऱ्यांना देत आहेत.

आगामी हंगामात शेतकऱ्यांना लागणाऱ्या खतांची अनेक शेतकरी आतापासून खरेदी किंवा बुकिंग करीत आहेत. मात्र असे करताना त्यांना लिंकिंगचा मोठा फटका बसतो आहे. वाशीम जिल्ह्यातील विक्रेत्यांनी यापूर्वीच खत उत्पादक कंपन्यांनी सुरू केलेल्या लिंकिंगबाबत वरिष्ठांकडे लेखी निवेदन पाठवले आहे. हाच प्रकार अकोल्यातही सुरू असून, हंगामाच्या तोंडावर काही ठिकाणी शेतकऱ्यांना लिंकिंगला सामोरे जावे लागत आहे.

आधीच रासायनिक खतांच्या किमती अव्वाच्या सव्वा वाढलेल्या असल्याने उत्पादन खर्चातही वाढ झाली आहे. शिवाय दुसरीकडे हवामान बदलामुळे दरवर्षी पिकांची उत्पादकता कमी येत आहे. बाजारात शेतीमालाचे भावसुद्धा चांगले मिळत नाहीत. अशा स्थितीत शेतकऱ्यांना नको असलेली रासायनिक खते माथी मारण्याचे प्रकार काही ठिकाणी होत आहेत.

विक्रेत्यांसमवेत वर्षानुवर्षे संबंध असल्याने शेतकरी तक्रार करायला पुढे येत नाहीत. मात्र दुसरीकडे हा प्रकार सुरू झाल्याने आर्थिक नुकसानही सहन करावे लागत आहे. गरज नसलेले खत खरेदी केल्याने त्याचा योग्य वापर होणार नाही पर्यायाने या खताचा अपव्ययच होईल. प्रशासनाने स्वतः पुढाकार घेत लिंकिंगचा हा अन्यायकारक प्रकार थांबवण्याची मागणी शेतकऱ्यांमधून केली जात आहे.