Kolhapur News : शेतशिवाराला जोडणारे रस्ते अतिक्रमणमुक्त करण्यासाठी चंदगड येथील महसूल विभागाने १०० दिवसांचा नावीन्यपूर्ण उपक्रम हाती घेतला आहे. तालुक्यातील ५३३ रस्त्यांपैकी ६५ रस्त्यांवर अतिक्रमण झाले आहे. ते खुले करण्याची प्रक्रिया सुरु झाली आहे.

आत्तापर्यंत सुमारे २५ रस्ते खुले केले आहेत. ११ एप्रिलपर्यंत उर्वरित रस्ते खुले केले जाणार असल्याची माहिती तहसीलदार राजेश चव्हाण यांनी दिली. पूर्वी केवळ खरिपाचा हंगाम घेतला जात असल्याने पीक कापणीनंतर शेतशिवारात जाण्यासाठी कोणाची आडकाठी नव्हती. शासनाने पूर्वीपासून शिवारांसाठी पाणंद रस्ते, शिव रस्ते, शिवार रस्ते, गाडीवाट या नावाने रस्ते ठेवले होते.

मात्र बहुतांश ठिकाणी त्यावर अतिक्रमण झाले आहे. अलीकडे कुटुंबाचे विभाजन झाल्यामुळे शेतजमिनीच्या वाटण्या झाल्या आहेत. प्रकल्पांमुळे बारमाही पाण्याची उपलब्धता झाल्याने पीक पद्धती बदलली आहे.

हमखास उत्पन्न देणारे पीक म्हणून उसाची लागवड मोठ्या प्रमाणात वाढली आहे. त्यामुळे एका शेतातून दुसऱ्या शेतात जाताना मोठ्या अडचणी आहेत. उसाची तोडणी केल्यानंतर वाहतुकीचाही प्रश्न आहे. यासंदर्भात शासनाकडे अनेक तक्रारी प्रलंबित असल्याने शासनाने खास उपक्रम राबवला आहे.

तालुक्यात ६ फेब्रुवारीला सुरु झालेल्या या अभियानांतर्गत नकाशे उपलब्ध करणे, स्थळ पाहणी करुन वहिवाट रस्ते शोधणे, गाव पातळीवर समिती स्थापन करणे आदी प्रक्रीया पूर्ण झाली आहे. काही ठिकाणी शेतकऱ्यांचे समुपदेशनाचे काम पूर्ण करुन प्रत्यक्ष रस्ते खुले केले जात आहेत.

रस्त्यात अडथळा आणला असल्यास मामलेदार कोर्ट अॅक्ट १९०६ कलम ५ नुसार आणि बांधावरून रस्त्याची मागणी केली असल्यास महाराष्ट्र जमीन महसूल अधिनियम १९६६ च्या कलम १४३ नुसार तडजोड घडवून रस्ता देण्याचे काम सुरु आहे. हे प्रयत्न असफल ठरल्यास भूमी अभिलेख उपअधीक्षकांच्या मदतीने रस्त्याची मोजणी करुन पोलिस बंदोबस्तात तो खुला केला जाणार आहे.