Akola News News : हरभरा पिकावर मर रोगाचा मोठ्या प्रमाणात प्रादुर्भाव झाल्याने येथील शेतकरी अनुप देशमुख यांनी पिकामध्ये ट्रॅक्टर चालवला.

अडगाव बुद्रुक परिसरातील विविध गावांमध्ये यंदा लागवड केलेले हरभऱ्याचे पीक सततच्या धुक्यामुळे अडचणीत सापडले आहे. पिकात मोठ्या प्रमाणात मर रोगाचा प्रादुर्भाव झाला आहे.

गेल्या आठवडयात मॉन्सूनोत्तर मुसळधार पाऊस झाला होता. यामुळेही नुकसान झाले. आता अनेक शेतांमध्ये हरभऱ्याच्या पिकात मर रोगाचा प्रादुर्भाव दिसून येत आहे. शेतकरी यावर उपाययोजना करीत असताना कुठलाही फायदा होताना दिसत नाही.

धुक्यामुळे हरभरा पिकात मर रोग वाढत चालला. जागोजागी पीक वाळले. यामुळे उत्पादन खर्चही वसूल होणार नसल्याने येथील शेतकरी अनुप देशमुख यांनी पीक नांगरून टाकले.

लागवडीपूर्व मशागत, पेरणीसाठी आणलेले बियाणे, रासायनिक खते, मजुरी असा मोठा खर्च झालेला आहे. पुन्हा पीक मोडण्यासाठी खर्च करावा लागला. अशी अवस्था या भागात अनेक शेतकऱ्यांची झाली आहे.