Washim News : रिसोड तालुक्यातील मोप मंडलातील लोणी बुद्रुक परिसरातील विविध गावांमध्ये यंदाच्या हंगामात लागवड असलेले हरभऱ्याचे पीक सततच्या धुक्यामुळे अडचणीत सापडले आहे. पिकात मोठ्या प्रमाणात मर रोगाचा प्रादुर्भाव झाला आहे.

गेल्या आठवड्यात मॉन्सूनोत्तर मुसळधार पाऊस झाला. यामध्ये नुकतेच पेरलेले हरभरा पीक तडाख्यात सापडले. अति पावसाने मर रोगाचा प्रादुर्भाव वाढत आहे. आता पाऊस उघडला तरी दररोज मोठ्या प्रमाणात धुके पडते आहे.

कोवळ्या असलेल्या हरभरा, गहू पिकाला अत्यंत घातक ठरत आहे. यंदा पेरणी पूर्व मशागत, वखरणी,रोटावेटर, पेरणी, खत,बी- बियाणे आदीसाठी मोठा खर्च करावा लागला होता. पीकविमा काढण्यासाठी शासनाने जरी एक रुपयात व्यवस्था केली तरी प्रत्यक्षात पीकविम्याच्या जाचक अटींमुळे विमा मिळण्याची शक्यताही कमीच आहे.