Pune News : केंद्र सरकारने पॅराबोइल्ड तांदूळ म्हणजेच उकडा तांदळ्याच्या निर्यातीवरील १० टक्के शुल्क शुन्य केले. तसेच बिगर-बासमती तांदळाच्या निर्यातीवर ४९० डॉलर प्रति टन निर्यात शुल्क देखील हटवण्याचा निर्णय घेतला आहे. याबाबत परराष्ट्र व्यापार महासंचालनालयाने (DGFT) बुधवारी (ता. २३) अधिसूचना जारी केली. याआधी सरकारने २८ सप्टेंबर रोजी गैर-बासमती पांढऱ्या तांदळावरील निर्यात बंदी उठवली होती आणि तांदळाच्या निर्यातीवर ४९० डॉलर प्रति टन किमान निर्यात मुल्य लागू केले होते.

केंद्र सरकारने २० जुलै २०२३ रोजी देशात तांदळाच्या किंमती नियंत्रित ठेवण्यासाठी बिगर बासमती पांढऱ्या तांदूळ आणि उकडा तांदळच्या निर्यातीवर घातली होती. जी गेल्या महिन्यात २८ सप्टेंबर रोजी उठवली. पण उकडा तांदूळ आणि बिगर बासमती पांढऱ्या तांदळाच्या निर्यात शुल्क लावले होते. उकडा तांदळच्या निर्यातीवर निर्यात शुल्क २० टक्क्यांवरून १० टक्क्यांवर आणले होते. तर बिगर-बासमती तांदळाच्या निर्यातीवर ४९० डॉलर प्रति टन निर्यात शुल्क लावण्यात आले होते. पण आता उकडा तांदूळ आणि बिगर बासमती पांढऱ्या तांदळाच्याबाबत निर्णय घेताना किमान निर्यात मुल्य तात्काळ प्रभावाने काढून टाकण्यात आल्याचे, महासंचालनालयाने (DGFT) अधिसूचनेत म्हटले आहे.

दरम्यान भारतीय तांदूळ निर्यातदार महासंघाच्या (आयआरइएफ) म्हणण्यानुसार, ओपन मार्केट सेल स्कीम (OMSS) अंतर्गत सध्या देशात २३५ लाख टन तांदळाचा मोठा साठा आहे. याशिवाय या हंगामात २७५ लाख टन अतिरिक्त तांदूळ बाजारात येण्याची शक्यता आहे. अशा प्रकारे देशात तांदळाचा मोठा साठा जमा होईल. अशा परिस्थितीत तांदूळ उत्पादक शेतकरी आणि भात व्यापारी यांना आंतरराष्ट्रीय बाजारपेठेत तांदूळ निर्यातीसाठी निर्बंधमुक्त काम करण्याची संधी मिळाली तरच दिलासा मिळू शकेल. सध्या तांदळाचे उत्पादन आणि साठवणुकीची समस्या यामुळे चालू खरीप हंगामात बफर स्टॉकसाठी तांदूळ खरेदी करणे सरकारला कठीण झाले आहे. सरकारच्या या निर्णयानंतर तांदळाची निर्यात वाढू शकते.

याबाबत आयआरइएफने केंद्रीय वाणिज्य मंत्री पियुष गोयल यांना अतिरिक्त साठा आणि जागतिक बाजारपेठेत पाकिस्तानसारख्या प्रतिस्पर्ध्यांकडून निर्माण होणाऱ्या अडचणींची माहिती दिली. तसेच उकडा तांदूळ आणि बिगर बासमती पांढऱ्या तांदळाचे किमान निर्यात शुल्क काढून टाकण्याची विनंती केली होती.

भारताने चालू आर्थिक वर्षात एप्रिल-ऑगस्ट दरम्यान २० कोटी १ लाख डॉलर किमतीचा गैर-बासमती पांढरा तांदूळ निर्यात केला आहे. तर २०२३-२४ मध्ये ही निर्यात ८५ कोटी २५.२ लाख डॉलरची होती. निर्यातीवर बंदी असली तरी, सरकार मालदीव, मॉरिशस, संयुक्त अरब अमिराती (UAE) आणि आफ्रिका यांसारख्या मित्र राष्ट्रांना बिगर बासमती पांढरा तांदळाची निर्यात केली आहे.