Sindhudurg News : जिल्ह्यातील दोडामार्ग तालुक्यात काजू पिकावर कीड-रोगांचा प्रादुर्भाव वाढला असुन कोवळी काजू बी खाणाऱ्या किडीच्या उपद्रवाने काजू बागायतदार हवालदिल झाले आहेत. जिल्ह्यात इतर भागात देखील काजू बी काळवंडण्याचे प्रकार यापूर्वी झाले आहेत.

जिल्ह्यात गेल्या काही दिवसांपासून ढगाळ वातावरण आहे. तत्पूर्वी डिसेंबर अखेरीस ढगाळ वातावरण निर्माण झाले होते. त्याचा मोठा परिणाम काजू पिकांवर झाला आहे. यापूर्वी अनेक भागांत कोवळी काजू बी काळवंडल्याचे चित्र होते.

दरम्यान दोडामार्ग तालुक्यात काजू पिकावर कीड-रोगांचे प्रमाण प्रचंड वाढले आहे. मोठ्या प्रमाणात कोवळी काजू बी काळवंडत आहेत. त्यातच आता कोवळी काजू बी खाणाऱ्या किडीचा उपद्रव सुरू झाला आहे. ही कीड कोवळी बी पोखरत आहे. त्यामुळे काजूचे मोठे नुकसान होत आहे. या किडीच्या उपद्रवाने काजू उत्पादक हैराण झाले आहेत.

या किडीचा सर्वाधिक प्रादुर्भाव दोडामार्ग तालुक्यात जाणवत आहे. याशिवाय उर्वरित भागात देखील काही प्रमाणात सुरू आहे. कीटकनाशक, बुरशीनाशकांच्या तीन-चार फवारण्या घेतल्यानंतर कीड-रोग नियत्रंणात येत नसल्यामुळे काजू बागायतदारांची चिंता वाढली आहे.