Sangamner News : संगमनेर तालुक्याच्या पठार भागातील शेतकऱ्यांसमोर चोरांचे संकट उभे राहिले आहे. सातत्याने शेतकऱ्यांच्या वीजपंप व केबल चोरी जात आहेत. त्यामुळे शेतकरी हतबल झाले आहेत. दुसरीकडे घारगाव पोलिस ठाण्यात गुन्हे दाखल होऊनही चोरट्यांचा शोध लागत नसल्यामुळे पोलिसांच्या कामकाजावर शेतकऱ्यांनी संताप व्यक्त केला आहे. चोरट्यांना जेरबंद करण्याची मागणी होत आहे.

संगमनेर तालुक्यातील पठार भागावर काही महिन्यांपूर्वी चोरट्यांनी बोटा, कुरकुटवाडी, केळेवाडी, माळवाडी, हिवरगाव पठार यागावासह आदी गावांमधील शेतकऱ्यांचे वीजपंप चोरून नेले आहेत. त्यानंतर शेतकऱ्यांनी घारगाव पोलिसात गुन्हेही दाखल केले. मात्र अद्याप पोलिसांना चोरट्यांचा शोध लावता आला नाही.

पुन्हा काही दिवसांपूर्वी चोरट्यांनी जांबूत, साकूर परिसरातील मुळा नदी पात्रातून वीज पंप व केबल चोरट्यांनी चोरून नेल्या आहेत. त्याही चोऱ्यांचा शोध लागला नाही. यावरच चोरटे थांबले नाहीत तर पुन्हा चोरट्यांनी शिंदोडी परिसरातील काही शेतकऱ्यांच्या पाणबुडी, वीज पंप व केबल चोरून पोबारा केला. त्यामुळे शेतकरी अक्षरशः वैतागले आहेत. पोलिस ठाण्यात फक्त गुन्हे दाखल होतात. मात्र चोरट्यांचा शोध काही लागत नाही.

आधीच पठार भागात समाधानकारक पाऊस न झाल्याने संपूर्ण खरीप हंगाम वाया गेला असून सर्वत्र दुष्काळसदृश परिस्थिती निर्माण झाली आहे. थोड्याफार प्रमाणात पाणी आहे, तर पिकांना बाजारभाव नाही, अशा कठीण परिस्थितीत शेतकरी शेती करत आहे. एवढ्या मोठ्या प्रमाणात चोऱ्या होऊनही घारगाव पोलिसांना चोरट्यांचा शोध लावता आला नाही. त्यामुळे आणखी किती शेतकऱ्यांच्या वीजपंप व केबल चोरी गेल्यानंतर घारगाव पोलिस शोध लावणार आहेत, असा सवालही संतप्त शेतकऱ्यांनी केला आहे.