Parbhani News : परभणी तालुक्यातील ताडपांगरी, वरपूड व किन्होळा ग्रामपंचायतीमधील प्रत्येकी एका प्रभागासाठी पोटनिवडणूक घेण्यात येणार आहे. त्यामुळे निवडणूक कार्यक्रम जाहीर झाल्यापासून या प्रभागांमध्ये निवडणुकीची आदर्श आचारसंहिता लागू झाली आहे.

राज्य निवडणूक आयोगाच्या कार्यक्रमानुसार निवडणुकीची नोटीस शुक्रवारी (ता. ६) प्रसिद्ध होणार आहे. नामनिर्देशनपत्रे सादर करण्याचा कालावधी सोमवार (ता. १६) ते शुक्रवार (ता. २०) सकाळी ११ ते दुपारी ३ वाजेपर्यंत आहेत. सोमवारी (ता. २३) सकाळी ११ वाजेपासून नामनिर्देशनपत्रांची छाननी करण्यात येणार आहे.

बुधवारी (ता. २५) निवडणूक चिन्ह नेमून देऊन अंतिम उमेदवारांची यादी दुपारी ३ वाजेनंतर प्रसिद्ध करण्यात येईल. आवश्यकता असल्यास रविवारी (ता. ५) सकाळी ७.३० ते सायंकाळी ५.३० वाजेपर्यंत मतदान घेण्यात येईल.

सोमवारी (ता. ६) मतमोजणी आणि जिल्हाधिकाऱ्यांच्या मान्यतेने निकाल घोषित करण्यात येणार आहे. जिल्हाधिकारी कार्यालयामार्फत निवडणुकीच्या निकालाची अधिसूचना गुरुवारी (ता. ९)पर्यंत प्रसिद्ध करण्यात येईल.

राज्य निवडणूक आयोगाच्या आदेशानुसार या निवडणूक कालावधीमध्ये निवडणूक प्रभागातील मतदारांवर विपरीत प्रभाव टाकणारी कोणतीही कृती किंवा घोषणा लोकप्रतिनिधींना आचारसंहिता कालावधीत करता येणार नाही.