Akola News : महाराष्ट्रातील एक अग्रगण्य सहकारी बँक म्हणून ओळख निर्माण झालेल्या बुलडाणा अर्बन को-ऑप क्रेडीट सोसायटीने वेअर हाऊस क्षेत्रातही मोठी झेप घेतली आहे. राज्यात स्वःबळावर सुमारे नऊ लाख टन अन्नधान्य साठवण्याची क्षमता असलेली गोदामांची साखळी उभी केली आहे. शिवाय आता शीतगृहाच्या क्षेत्रातही काम हातात घेतले असून, एक लाख टनाची क्षमता तयार केली आहे. याचा राज्यातील विविध जिल्ह्यांतील शेतकरी, साठवणूकदार, खरेदीदार फायदा घेत आहेत, अशी माहिती बुलडाणा अर्बनचे संस्थापक राधेश्याम चांडक यांनी ‘अॅग्रोवन’शी बोलताना दिली.

देशात उत्पादित होणाऱ्या एकूण अन्नधान्यापैकी दर वर्षी १० ते १२ टक्के अन्नधान्य हे व्यवस्थित साठवणुकीअभावी खराब होत असते. यामुळे केंद्र सरकारने देशात आता अन्नधान्य साठवणुकीच्या पर्याप्त सुविधा तयार करण्याचे धोरण स्वीकारले आहे. बुलडाणा अर्बनने या क्षेत्रात दोन दशकांपूर्वीच काम सुरू केले होते. बाजारपेठेत ज्यावेळी भाव वाढेल तेव्हा शेतकरी आपला माल विक्री करू शकतो.

तोपर्यंत साठवणूक केलेल्या धान्याची व्यवस्थित देखरेख, काळजी घेतली जाते. आज राज्याची साठवणूक क्षमता २३ लाख टनांची आहे. तर, बुलडाणा अर्बन को-ऑप क्रेडिट सोसायटीच्या धान्य गोदामांची नऊ लाख टनांची क्षमता तयार झाली आहे. बुलडाणा अर्बनचे स्वतःचे ४१० वेअर हाऊस आहे. शिवाय २६५ वेअर हाऊसेस भाडेतत्वावर घेऊन धान्य साठवणुकीची सुविधा दिली जाते. स्वतः नऊ शीतगृहेसुद्धा उभारली असून ११ भाड्याने घेतलेली आहेत.

मध्य प्रदेश बराच पुढे

अन्नधान्य साठवणुकीच्या क्षेत्रात सध्या महाराष्ट्रात मोठा वाव आहे. राज्याची २३ लाख टन साठवणुकीची क्षमता आहे. तर, बुलडाणा अर्बनची नऊ लाख मेट्रिक टनांची आहे. मात्र, शेजारच्या मध्य प्रदेशाची हीच अन्नधान्य साठवण्याची क्षमता आपल्यापेक्षा मोठी म्हणजे १६७ लाख टनांची तयार झालेली आहे. महाराष्ट्राला या क्षेत्रात आणखी बराच मोठा पल्ला गाठावा लागणार आहे.