Pune News : या वर्षात झालेल्या अनियमित व अपुऱ्या पावसाचा फटका पिकांप्रमाणेच प्रकल्पांवरही झाला आहे. जिल्ह्यात मोठ्या व मध्यम प्रकल्पात सध्या अवघा ३० टक्के साठा असून मागील वर्षाच्या तुलनेत हा अर्धाच साठा असल्याने येत्या काळात टंचाईच्या झळा वाढण्याची शक्यता आहे. प्रामुख्याने खडकपूर्णासारखा मोठा प्रकल्प यंदा कोरडा असल्याने घाटावरील बहुतांश तालुक्यांना त्याचा फटका सहन करावा लागेल हे निश्‍चित झाले आहे.

जिल्ह्यातील प्रकल्पांच्या स्थितीचा आढावा घेतला असता मोठ्या प्रकल्पांपैकी नळगंगामध्ये २५.६२ दलघमी (३६.९५९ टक्के), पेनटाकळी १६.५१ दलघमी साठा असून २७.५३ टक्केवारी आहे. मोठ्या प्रकल्पांपैकी प्रमुख खडकपूर्णा प्रकल्प फेब्रुवारीच्या मध्यातच कोरडा झाला आहे. या प्रकल्पात ० टक्के साठा आहे.

मध्यम प्रकल्पांत तुलनेने बरा साठा अद्याप आहे. यात ज्ञानगंगामध्ये २२.३६ दलघमी (६५ टक्के), मस ९.३३ (६२ टक्के), कोराडी ८.३५ (५५.०९), पलढग ३.१७ ( ४२.२१), मन ११.८० (३२.०४), तोरणा १.३९ ( १७.६२), उतावळी ६.७२ (३३टक्के) साठा आहे.

सर्व मध्यम प्रकल्प मिळून ६३.१० दलघमी साठा असून याची सरासरी टक्केवारी ४४.५३ आहे. वास्तविक गेल्या वर्षी या मध्यम प्रकल्पात तब्बल १०४.३५ दलघमी साठा होता. त्याची सरासरी टक्केवारी ७३.६५ एवढी होती. यावर्षी तुलनेने अर्धाच साठा शिल्लक राहलेला आहे.

लघू प्रकल्पांतील जेमतेम साठा

जिल्ह्यातील ३७ लघू प्रकल्पांत सध्या एकूण ३४.५७० दलघमी साठा शिल्लक आहे. सरासरीच्या ३४.८१ टक्के हा साठा आहे. मागील वर्षात या प्रकल्पात ५३.०२ दलघमी व ५३.३९ टक्के साठा होता. जवळपास २० टक्के पाणी या लघु प्रकल्पांमध्ये कमी आहे. सलग जोरदार पाऊस न झाल्याने बरेच प्रकल्प पूर्ण क्षमतेने भरलेले नव्हते.

जे भरले त्यातील पाण्याचा वापर, बाष्पीभवनामुळे फेब्रुवारीतच साठा कमी झालेला आहे. पुढील चार महिने पाण्याची मोठी मागणी वाढणार आहे. पुढील काळात वाढणारी मागणी पाहता हे पाणी उन्हाळाभर पुरेल की नाही याबाबत साशंकता व्यक्त होत आहे.

प्रकल्पांची स्थिती

प्रकल्प उपयुक्त साठा टक्केवारी मागील वर्षाची टक्केवारी

मोठे प्रकल्प ४२.१२७० दलघमी १८.९२ टक्के ६०.१२

मध्यम प्रकल्प ६५.१०० ४४.५३ टक्के ७२.६५