Sangli News : यंदाच्या हंगामातील बेदाणा निर्मितीचा हंगाम सुरू झाला आहे. अनेक ठिकाणी शेडवर बेदाणा निर्मितीसाठी उत्पादक शेतकऱ्यांची लगबग सुरू झाली आहे. नागज (ता. कवठेमहांकाळ) पट्ट्यात सुमारे ५० टक्के बेदाणा शेडवर तयार होत आहे. फेब्रुवारी महिन्याच्या पहिल्या आठवड्यात निर्मितीस गती येईल, अशी आशा बेदाणा उद्योगातील जाणकारांनी व्यक्त केली आहे.

जिल्ह्यातील कवठेमहांकाळ तालुक्यातील नागज परिसरासह मिरज तालुक्याचा पूर्व भाग, जत तालुक्याच्या पूर्व भागासह अन्य भागात बेदाणा तयार केला जातो. दरवर्षी जानेवारीच्या दुसऱ्या, तिसऱ्या आठवड्यापासून बेदाणा निर्मिती सुरू होते.

मात्र गतवर्षी द्राक्ष हंगाम धरण्याच्या पाऊस झाल्याने फळ छाटणी मागे पुढे झाली होती.त्यामुळे यंदाचा हंगाम फेब्रुवारीच्या तिसऱ्या आठवड्यापासून बेदाणा निर्मितीचा हंगाम सुरू झाला होता.

यंदाही द्राक्ष हंगामाच्या प्रारंभी नैसर्गिक संकट आले. पण शेतकऱ्यांनी काटेकोर नियोजन करत बागा साधल्या. यंदाचा हंगामाची पूर्व तयारी डिसेंबर महिन्यापासून सुरू झाली. नागज, जुनोणी, यासह अन्य भागातील बेदाणा शेड मालकांनी शेडच्या दुरुस्तीचे काम हाती घेतले होते. बेदाणा दुरुस्तीचे काम पूर्ण झाले आहे.

बेदाणा तयार करणाऱ्या पट्ट्यात सुमारे ४ हजार शेड आहेत. त्यापैकी ५० टक्के बेदाणा शेड बेदाणा निर्मितीसाठी तयार झाले आहेत. बेदाणा शेडवर राज्यासह परराज्यातील मजूरही दाखल झाले आहेत.

सध्या द्राक्षाची विक्री झालेल्या द्राक्षापासून बेदाणा तयार करण्यासाठी शेतकरी पुढे येवू लागले आहेत. थॉमसन, तास-ए- गणेश, माणिक चमन, क्‍लोन टू, सोनाका या द्राक्षाच्या वाणापासून बेदाणा तयार होते.

सध्या बेदाण्याचे असणारे द्राक्षाचे वाणही बेदाणा निर्मितीसाठी येवू लागले आहेत. फेब्रुवारी महिन्याच्या पहिल्या आठवड्यापासून बेदाणा निर्मितीस गती येईल.गेल्या दोन ते तीन दिवसांपूर्वी ढगाळ वातावरण होते. त्यामुळे बेदाणा निर्मितीस अडथळे आल्याने बेदाणा सुकण्यास विलंब लागत होता. सध्या बेदाणा तयार होण्यासाठी पोषक वातावरण असल्याने बेदाणा उत्पादक शेतकऱ्यांना दिसाला मिळत आहे.