Satara News : आनंदपूरसारख्या डोंगरालगतच्या निसर्गाची उत्तम देणगी असणाऱ्या भाजीपाला उत्पादन करणाऱ्या गावात फक्त मधापुरता मधुमक्षिकापालन हा व्यवसाय न करता परागीभवनाद्वारे पिकाचे ५ ते ४० टक्के उत्पादनवाढीसाठी शेतीला जोडधंदा म्हणून मधुमक्षिकापालन करा व निसर्गातील मधुमक्षिकांना घर देण्याचे समाजकार्य शेतकऱ्यांनी करावे, असे बोरगाव कृषी विज्ञान केंद्राचे विषय विशेषज्ञ डॉ. स्वाती गुर्वे यांनी केले.

आनंदपूर (ता. वाई) येथे कृषी विज्ञान केंद्र, बोरगाव, आत्मा व कृषी विभा यांच्या संयुक्त विद्यमाने शास्त्रोक्त पद्धतीने मधुमक्षिकापालन प्रशिक्षण पार पडले

या वेळी डॉ. गुर्वे बोलत होत्या. अध्यक्षस्थानी तालुका कृषी अधिकारी प्रशांत शेंडे होते. डॉ. गुर्वे म्हणाल्या, की मधुमक्षिकेचे मानवी जीवनात अनन्यसाधारण महत्त्व असून तिचे संगोपन व संवर्धन करणे आज निसर्गाची जैवविविधता राखण्यासाठी काळाची गरज आहे.

सरपंच संतोष साळुंखे, प्रेम साळुंखे, भाऊसाहेब शेलार, सुनील फरांदे, विनोद शेळके, विक्रम मोहिते, योगेश जायकर, हणमंत साळुंखे आदी उपस्थित होते. निखिल रायकर यांनी प्रास्ताविक केले. प्रदीप देवरी यांनी सूत्रसंचालन केले. प्रमोद साळुंखे यांनी आभार मानले. बीटीएम आत्मा प्रदीप देवरे, प्रमोद साळुंखे यांनी नियोजन केले.