Nashik News : आदिवासी महामंडळाने​​​​​​ बाळ हिरड्याची तातडीने ​​​​​​​सरकारी खरेदी सुरू करावी, या प्रमुख मागणीसाठी ​​​​​​​​​​​​​​​​​​​​​किसान सभेचे धरणे आंदोलन सुरू आहे. दरम्यान, प्रशासनाकडून सकारात्मक प्रतिसाद मिळत नसल्याच्या निषेधार्थ सोमवारी दुपारी संतप्त कार्यकर्त्यांनी व शेकडो आदिवासी शेतकऱ्यांनी नाशिक येथील आदिवासी विकास कार्यालयात घुसून निदर्शने केली.

किमान आधार भावाने सरकार प्रसंगी हिरडा खरेदी करावी, या मागणीसाठी किसान सभेच्या नेतृत्वाखाली मे महिन्यात अकोले ते लोणी पायी मोर्चा काढण्यात आला होता. यावेळी आदिवासी विकासमंत्री विजयकुमार गावित यांनी दरवर्षी इतर पिकांप्रमाणे हिरडा पिकाचेही किमान हमी भाव जाहीर केले जातील, असे आश्वासन दिले होते.

परंतु मंत्र्यांच्या आश्वासनानंतर पाच महिन्यांनंतरही आदिवासी महामंडळाकडून हिरड्याची खरेदी सुरू करण्यात आली नाही. त्याच्या निषेधार्थ किसान सभेच्या नेतृत्वाखाली नाशिक येथे आदिवासी शेतकऱ्यांनी धरणे आंदोलन सुरू होते. परंतु, प्रशासनाकडून सकारात्मक प्रतिसाद मिळत नसल्याने आज किसान सभेने आक्रमक भूमिका घेतली.

अजित नवले आणि डी एल कराड यांच्या नेतृत्वाखाली आदिवासी शेतकऱ्यांनी आदिवासी विकास भवनावर मोर्चा काढला. त्यानंतर कार्यालयात घुसून सरकारच्या धोरणाचा निषेध करण्यात आला. कार्यकर्ते आणि शेतकरी कार्यालयात घुसल्यानंतर कार्यालयामध्ये कर्मचाऱ्यांची धावपळ उडाली. यावेळी आंदोलकांकडून हिरडा व्यापाऱ्यांकडून होणारी लुट थांबवली जावी यासाठी हिरड्याची सरकारी खरेदी तातडीने सुरु करण्याची मागणी करण्यात आली.