Sangli News : सांगलीजवळ कृष्णेचे पात्र कोरडे पडल्याने ताकारीचे ४ पंप बंद करून पाणी १ फेब्रुवारी रोजी सांगलीकडे कृष्णा नदीत सोडण्यात आले. मुख्य कालव्याचा प्रवाह मंद झाल्याने लाभक्षेत्रातील शेतकरी धास्तावले आहेत.

ताकारीच्या पाच पंपांचे पाणी तिसऱ्या टप्प्यातून सोनहिरा खोऱ्यात कायम सुरू ठेवले आहे. मुख्य कालव्याचे पाणी बंद झाल्याने अवलंबून असणारे शेतकरी चिंताग्रस्त आहेत. ताकारी लाभक्षेत्रातील मागणी विचारात घेऊन पाटबंधारे विभागाने ताकारी योजनेचे यावर्षीचे तिसरे व रब्बी हंगामातील दुसरे आवर्तन २२ जानेवारी रोजी रात्री सुरू केले.

पाण्याचा लाभ योजनेच्या १८ हजार हेक्टर क्षेत्राला होणार आहे. आवर्तन सुरू झाल्याने शेतकऱ्यांतून समाधान व्यक्त होत आहे. परंतु सांगलीत टंचाई जाणवू लागल्याने व कृष्णा पात्र कोरडे पडल्याने ताकारी, टेंभू योजनेचे निम्मे पंप बंद करण्याचे निर्देश देण्यात आलेत. नदीकाठच्या गावांना पिण्याच्या पाण्यासाठी ताकारीचे सुरू असणारे ९ पैकी ४ पंप बंद करून पाणी नदीत सोडले गेले.

ताकारीचे सुरू असणाऱ्या उर्वरित ५ पंपांचे पाणी तिसऱ्या टप्प्यातून सोनहिरा खोऱ्यात सुरू आहे. मुख्य कालवा आटला आहे. १० दिवसांत मुख्य कालव्याचे पाणी बंद झाल्याने शेतकऱ्यांतून चिंतेचा सूर उमटत आहे.

ताकारीच्या वाट्याचे यावर्षीचे ३.६ टीएमसी पाणी अद्याप उचलणे बाकी आहे. चालू आवर्तन ३० ते ३५ दिवस देण्याचे नियोजन आहे. ताकारी योजना सक्षमपणे कार्यरत असून आवर्तनही वेळेत मिळत आहे.