Pune News : बहुप्रतिक्षित कोकण हापूसचा हंगाम बहरात आला आहे. पुणे बाजार समितीत रविवारी (ता. १०) रत्नागिरी येथून हापूस आंब्याच्या सुमारे २ हजार पेट्यांची आवक झाली. गेल्या आठवड्याच्या तुलनेत ही आवक दुपटीपेक्षा अधिक होती.

रत्नागिरीसह देवगड येथूनही आंब्याची आवक होत असून, देवगडच्या सुमारे ५० पेट्यांची आवक झाली होती. तर कर्नाटक (Karnataka) येथून हापूससह विविध वाणांचे सुमारे २ हजार बॉक्स आणि करंड्याची आणि सुमारे २०० पेट्यांची आवक झाली.

हापूसच्या हंगामाबाबतची माहिती देताना अडते असोसिएशनचे सचिव आणि कोकण हापूसचे प्रमुख अडतदार करण जाधव म्हणाले, ‘या वर्षी पहिल्या टप्प्यातील मोहर चांगला असल्याने उत्पादनदेखील चांगले आहे. यामुळे पहिल्या टप्प्यातील आवक मोठ्या प्रमाणाव होण्यास सुरुवात झाली आहे.

तापमान वाढू लागल्याने फळेदेखील परिपक्व होण्याच्या स्थितीत असल्याने गेल्या आठवड्याच्या तुलनेत दुपटीपेक्षा अधिक २ हजार पेट्यांची आवक रविवारी (ता. १०) झाली. या वेळी ४, ५ आणि ६ डझनच्या पेटीला ३ ते ४ हजार रुपये तर ५ ते ९ डझनाच्या पेटीला ४ ते ७ हजार रुपये दर मिळाला. हे दर गेल्या आठवड्याच्या तुलनेत ५०० रुपयांनी घटले होते.’

देवगड आंब्याचे (Devgad Mango) अडतदार अरविंद मोरे म्हणाले, ‘देवगड आंब्याची रत्नागिरीच्या तुलनेत आवक कमी होते. रविवारी (ता. १०) ५० पेट्यांची देवगड येथून आवक झाली होती. या वेळी ४ ते ६ डझनाच्या पेटीला ३ हजार ते ४ हजार ५०० रुपये दर होता.’

कर्नाटक आंब्याचे प्रमुख अडतदार रोहन उरसळ म्हणाले, ‘कर्नाटकच्या आंब्याची देखील मोठी आवक सुरू झाली असून २ हजार बॉक्स आणि करंड्यांसह सुमारे २०० लाकडी पेट्यांमधून आंब्याची आवक झाली होती. ही आवक आता टप्प्याटप्प्याने वाढत जाईल. पाडवा आणि अक्षय्यतृतीयेला मुबलक आंबा उपलब्ध राहील.’

कर्नाटक आंब्याचे दर

हापूस आणि पायरी ः ४-५ डझन - १५०० ते २ हजार

लालबाग (एक किलो) ः ६० ते १०० रुपये

बैंगणपल्ली (प्रति किलो) ः ७० ते १०० रुपये