Chilli Rate : कळमना बाजार समितीत लगतच्या आंध्र प्रदेश तसेच तेलंगणा राज्यातून लाल मिरचीची आवक वाढती आहे. सध्या लाल (वाळलेल्या) मिरचीला ४००० ते १४ हजार रुपये प्रति क्‍विंटलचा दर मिळत आहे. गेल्या आठवड्याच्या तुलनेत यात प्रति क्‍विंटल १००० रुपयांची घट नोंदविण्यात आल्याची माहिती व्यापारी सूत्रांनी दिली.

कळमना बाजार समितीत एकट्या लाल मिरचीच्या व्यवहारात कोट्यवधी रुपयांची उलाढाल होते. बाजारात आवक होणाऱ्या लाल मिरचीमध्ये आंध्र प्रदेश तसेच तेलंगणा राज्यातील मिरचीचा सर्वाधीक वाटा आहे. मात्र गेल्या पंधरा दिवसांपासून लाल मिरचीचे दर ५००० ते १५ हजार रुपयांवर स्थिरावल्याचे चित्र आहे.

मधल्या काळात आवक पाच हजार क्‍विंटलवर पोचली असताना दरांनी त्याचवेळी १३ ते १५ हजार रुपयांचा पल्ला गाठला. या काळात लाल मिरचीचा सरासरी दर १४५०० असा होता. १९ ते २० मार्च या कालावधीत हा वाढीव दर मिळाला, असे व्यापारी सूत्रांनी सांगितले.

त्यानंतर पुन्हा २६ मार्चला दराने १३ ते १५ हजार रुपये क्‍विंटलचा पल्ला गाठला. त्यावेळी सरासरी दर १२५०० रुपये होते. त्यानंतर आता पुन्हा ४००० ते १४ हजार असा दर लाल मिरचीला मिळत आहे. बाजारातील मिरचीची आवक २८६९ क्‍विंटलवर स्थिरावल्याची माहिती देखील व्यापारी सूत्रांनी दिली. अमरावती येथील फळे व भाजीपाला बाजार समितीत मंगळवारी (ता.२) एक क्‍विंटलही लाल मिरचीची आवक झाली नाही. या ठिकाणी हिरव्या मिरचीची अत्यल्प ६० क्‍विंटल आवक नोंदविली गेली.