Washim News : सिंचन विहिरींचे प्रशासकीय मंजुरीचे १०० टक्के उद्दिष्ट साध्य केल्यामुळे जिल्ह्यातील मानोरा, मंगरूळपीर, कारंजा या तीन तालुक्यांच्या गटविकास अधिकाऱ्यांचा सन्मान करण्यात आला. जिल्हाधिकारी बुवनेश्वरी एस. आणि ‍जिल्हा परिषद मुख्य कार्यकारी अधिकारी वैभव वाघमारे यांच्या हस्ते गौरव झाला.

मानोरा तालुका गट विकास अधिकारी गजानन पिल्लेवाड, मंगरूळपीरचे रवींद्र सोनोने आणि कारंजाचे प्रफुल्ल तोटावाड यांचा यात समावेश आहे. महात्मा गांधी राष्ट्रीय ग्रामीण रोजगार हमी योजनेच्या कामांना ‍जिल्हा प्रशासन प्राधान्य देत आहे. यामध्ये सिंचन विहिरींच्या कामांचा प्रामुख्याने समावेश आहे.

जिल्ह्यातील तीन तालुक्यांमध्ये सिंचन विहिरींचे प्रशासकीय मंजुरीचे १०० टक्के उद्दिष्ट साध्य झाले. मानोरा तालुक्यात १९२५ विहिरींचे उद्दिष्ट होते. त्यापैकी २४१२ विहिरींना प्रशासकीय मंजुरी देत १२५ टक्के काम झाले. मंगरूळपीरमध्ये १९०० उद्दिष्ट असताना २२०० विहिरी झाल्या. हे ११५ टक्के काम आहे. तर कारंजा तालुक्यात २२७५ उद्दिष्ट असताना २२५० म्हणजेच ९९ टक्के उद्दिष्ट्यपूर्ती झाली.

मागेल त्याला विहीर ः बुवनेश्वरी एस.

शासनाच्या वतीने एका गावात १५ सिंचन विहिरींचे उद्दिष्ट देण्यात आले आहे. ते वाढवून प्रत्येक गावांना २५ विहिरींचे उद्दिष्ट दिले आहे. त्याचसोबत जो शेतकरी मागणी करेल त्यांना विहीर मंजूर करण्याचे अधिकार गट ‍विकास अधिकाऱ्यांना दिले आहेत. शेतकऱ्यांचे उत्पन्न वाढून त्यांची आर्थिक परिस्थिती सुधारावी आणि जिल्ह्यातील शेतकरी आत्महत्या रोखण्याच्या उद्देशाने हा निर्णय घेतला, असे जिल्हाधिकारी बुवनेश्वरी यांनी म्हटले.

जिल्ह्यातील शेतकऱ्यांनी लाभ घ्यावा : वाघमारे

जिल्ह्यातील शेतकऱ्यांनी महात्मा गांधी राष्ट्रीय ग्रामीण रोजगार हमी योजनेअंतर्गत सिंचन विहिरींचा लाभ ‌घ्यावा आणि ज्या विहिरींना प्रशासकीय मान्यता दिली त्यांची कामे तातडीने पूर्ण करण्याचे आवाहन‍ जिल्हा परिषदेचे मुख्य कार्यकारी अधिकारी वैभव वाघमारे यांनी केले आहे. तसेच मागे राहिलेल्या तालुक्यामधील उद्दिष्ट पूर्ण करण्याचे निर्देश संबंधित गट विकास अधिकाऱ्यांना दिले आहेत.