Nanded News : जिल्ह्यातील काही महसूल मंडलांमध्ये जून ते सप्टेंबर २०२३ या कालावधीत सरासरी पर्जन्याच्या ७५ टक्क्यांपेक्षा कमी व एकूण ७५० मि.मी. पेक्षा कमी पर्जन्यमान झाले आहे, अशा २५ महसुली मंडलामध्ये दुष्काळसदृश परिस्थिती घोषित करण्यात आली आहे.

दुष्काळसदृश परिस्थिती लागू केलेल्या आठ तालुक्यातील २५ महसुली मंडलांना सवलती लागू करण्याचे आदेश जिल्हाधिकारी अभिजित राऊत यांनी निर्गमित केले आहे. दुष्काळसदृश परिस्थिती घोषित करण्यात आलेले तालुके व महसूल मंडलामध्ये हदगाव तालुक्यातील निवघा, पिंपरखेड या महसूल मंडलाचा समावेश आहे.

नांदेड तालुक्यातील वजीराबाद, तुप्पा, वसरणी, विष्णुपुरी, तरोडा बु, या मंडलांचा, तर हिमायतनगर तालुक्यातील सरसम, जवळगाव या महसूल मंडलांचा समावेश आहे. नायगाव तालुक्यातील कुंटूर, नायगाव खै., बरबडा या मंडलांचा तर कंधार तालुक्यातील कंधार, कुरुळा, फुलवळ, पेठवडज, उस्माननगर, बारुळ या महसूल मंडलांचा समावेश आहे.

मुखेड तालुक्यातील मुखेड, जांब बु., मुक्रामाबाद तर लोहा तालुक्यातील कापसी (बु.) कलंबर, सोनखेड यांचा, तर देगलूर तालुक्यातील हणेगाव या महसूल मंडलाचा समावेश आहे.