Parbhani News : यंदाच्या (२०२३) रब्बी हंगामापासून पीक स्पर्धा तालुका,जिल्हा व राज्य पातळीवर राबविण्यात येणार आहे.त्यानुसार कृषी विभागामार्फत यंदाच्या रब्बी हंगामामध्ये सर्वसाधारण व आदिवासी गटासाठी ज्वारी, गहू, हरभरा, करडई, जवस या ५ पिकांसाठी पिक स्पर्धेचे आयोजन करण्यात आले आहे.

स्पर्धेसाठी पीकनिहाय सर्वसाधारण गटासाठी ३०० रुपये तर आदिवासी गटासाठी १५० प्रवेश शुल्क राहणार आहे.इच्छुक शेतकऱ्यांना या स्पर्धेत सहभागी होण्यासाठी रविवार (ता.३१) पर्यंत अर्ज सादर करावेत असे आवाहन जिल्हा अधीक्षक कृषी अधिकारी रवि हरणे यांनी केले आहे.

या स्पर्धेत भाग घेण्यासाठी शेतकऱ्याकडे स्वतःच्या नावे जमीन असणे व ती जमीन तो स्वतः कसत असणे आवश्यक आहे.शेतकऱ्याला एकाच वेळी एकापेक्षा जास्त पिकासाठी स्पर्धेत भाग घेता येईल. सहभागी लाभार्थीच्या स्वतःच्या शेतावर त्या पिकाखाली किमान ४० आर क्षेत्रावर सलग लागवड असणे आवश्यक आहे.

विहित नमुन्यातील अर्ज (प्रपत्र-अ) ठरवून दिलेले प्रवेश शुल्क भरल्याचे चलन, ७-१२, ८-अ चा उतारा, जात प्रमाणपत्र (केवळ आदिवासी असल्यास) पिक स्पर्धेसाठी शेतकऱ्याने संबंधित ७-१२ वरील घोषित केलेल्या क्षेत्राचा चिन्हांकित केलेला नकाशा बँक खाते चेक पासबुकच्या पहिल्या पानाची छायांकित प्रत असणे आवश्यक आहे.

पीक स्पर्धेसाठी रविवार (ता.३१) पर्यंत अर्ज दाखल करता येतील आहे. अंतिम मुदतीच्या दिवशी शासकीय सुट्टी असल्यास त्यापुढील शासकीय सुट्टी नसलेली तारीख गृहीत धरण्यात यावी.तालुकास्तर, जिल्हास्तर, राज्यस्तरावरील पिक स्पर्धा निकाल प्रथम,द्वितीय व तृतीय क्रमांकाचे पिक स्पर्धा विजेते निवडण्यात येतील.

स्पर्धा पातळी सर्वसाधारण व आदिवासी गटासाठी पुढील प्रमाणे बक्षिस स्वरुप असणार आहे.यामध्ये तालुका पातळीवर पहिले बक्षीस ५ हजार रुपये, दुसरे बक्षीस ३ हजार रुपये, तिसरे बक्षीस २ हजार रुपये आहे. जिल्हा पातळीवर पहिले बक्षीस १० हजार रुपये दुसरे ७ हजार हजार रुपये, तिसरे ५ हजार रुपये आहे.

राज्य पातळीवर पहिले बक्षीस ५० हजार,दुसरे बक्षीस ४० हजार,तिसरे बक्षीस ३० हजार रुपये आहे. दुय्यम तसेच पौष्टिक तृणधान्य पिकांच्या क्षेत्रात आणि उत्पादनात वाढ व्हावी याकरीता जास्तीत-जास्त शेतकऱ्यांनी पीक स्पर्धेत सहभागी व्हावे.पीक स्पर्धेबाबत अधिक माहीतीकरीता शेतकऱ्यांनी संबंधित तालुका कृषी अधिकारी कार्यालयाशी संपर्क साधावा असे आवाहन हरणे यांनी केले आहे.