Santosh Deshmukh Murder Case : राज्यात सध्या संतोष देशमुख हत्या प्रकरणावरून राजकीय वातावरण चांगले तापलेलं आहे. दरम्यान सामाजिक कार्यकर्त्या अंजली दमानिया यांच्यासह अजित पवार गटाच्या नेत्या रुपाली ठोंबरे यांनी वेगवेगळे धक्कादायक दावे केले होते. याप्रकरणी दोघांच्या अडचणीत वाढ होण्याची शक्यता आहे. दमानियांच्या धक्कादायक दाव्यानंतर बीड पोलिसांनी नोटीस पाठवली आहे. तर जितेंद्र आव्हाड यांच्यावर आरोप केल्याप्रकरणी ठोंबरे यांच्यासह सात जनांवर गुन्हा दाखल करण्यात आला आहे.

दमानियांचा खळबळजनक दावा

बीड जिल्ह्यातील परळी तालुक्यातील मस्साजोग या गावचे सरपंच संतोष देशमुख यांची हत्या करण्यात आली आहे. यावरून सध्या राज्याचे राजकीय वातावरण तापले आहे. यावरून आरोप-प्रत्यारोप केले जात असतानाच दमानिया यांनी, फरार आरोपींची हत्या करण्यात आल्याचा खळबळजनक दावा केला आहे. ज्यामुळे राज्यात एकच खळबळ उडाली होती. यानंतर आता बीड पोलिसांनी दमानिया यांना नोटीस पाठवली आहे.

स्थानिक गुन्हे शाखेची नोटीस

तसेच ज्या मोबाईल नंबरवरून व्हॉइस मेसेज आले होते, तो नंबर, व्हॉइस मेसेज, इतर माहिती आणि पुरावे बीड पोलिसांना सादर करण्याचे निर्देश देण्यात आले आहेत. ही नोटीस बीड पोलिसांच्या स्थानिक गुन्हे शाखेचे पोलीस निरीक्षक उस्मान शेख यांनी पाठवली आहे.

दमानियांचा पलटवार

आता या नोटीसवरूनही दमानिया यांनी पोलिसांना घेरलं असून माझ्या दाव्यानंतर पोलिसांनी येथे पथक पाठवायला हवं होतं. पण पोलिसांनी पडताळणी का केली नाही? याचा खुलासा करायला हवा. सदर घटना गंभीर असून सत्य बाहेर आले पाहिजे. पण पोलिसांकडून असे काहीच होताना दिसत नसल्याचा आरोप देखील दमानिया यांनी केला आहे.

ठोंबरेंसह सात जणांविरोधात गुन्हा दाखल

एकीकडे बीड पोलिसांनी दमानिया यांना नोटीस पाठवली असतानाच पोलिसांनी रुपाली ठोंबरे यांच्यासह सात जणांविरोधात गुन्हा दाखल केला आहे. ठोंबरे यांनी समाजमाध्यमावर आव्हाड यांच्या व्हॉट्सअॅप चॅटचा एक स्क्रीनशॉट शेअर केला होता. तसेच आव्हाड यांच्यावर आरोप केले होते. मात्र आव्हाड यांनी, तो स्क्रीनशॉट आपला नसून खोटा असल्याचे सांगितले आहे.

तसेच याविरोधात बीडमधील शिवाजीनगर पोलिस ठाण्यात रितसर फिर्याद दिली. याप्रकरणी आता गुन्हा दाखल झाला असून कर नाही डर कशाला? असे त्यांनी म्हटले आहे. व्हॉट्सअॅप चॅटचा खोटा स्क्रीनशॉट शेअर केल्याप्रकरणी ठोंबरे यांच्यासह विक्रांत फड, रेखा फड, कृष्णा धानोरकर, बिभीषण अघाव, आकाश चौरे आणि सौरभ आघाव अशी गुन्हा दाखल झालेल्यांची नावे आहेत.