Akola : अकोला जिल्ह्यात बी-बियाणे व खतांच्या कंपन्या कृषी केंद्रांना विक्री करीत असताना लिंकिंग करून खते व बी-बियाण्यांची विक्री करीत असल्याने कारवाईची मागणी कामगारमंत्री तथा जिल्ह्याचे पालकमंत्री आकाश फुंडकर यांनी मुख्यमंत्री देवेंद्र फडणवीस यांच्याकडे केली आहे.

त्याची दखल घेत मुख्यमंत्री श्री. फडणवीस यांनी अशा प्रकारे लिंकिंग होत असल्यास गुन्हे दाखल करण्यात येतील’ असा स्पष्ट इशारा राज्यस्तरीय खरीप बैठकीत दिला आहे. पालकमंत्री ॲड. फुंडकर यांनी शनिवारी (ता.१७) जिल्हास्तरीय खरीप आढावा बैठकीत खरीप नियोजनाचा आढावा घेतला होता.

झालेल्या चर्चेच्या अनुषंगाने जिल्ह्यासाठी आवश्यक निविष्ठा व इतर बाबींबाबत मागणीचे निवेदन पालकमंत्र्यांनी मुख्यमंत्री श्री. फडणवीस यांना दिले. त्यानुसार निविष्ठांच्या सुरळीत पुरवठ्याचे निर्देश मुख्यमंत्र्यांनी राज्यस्तरीय बैठकीत दिले आहेत. खरीप हंगामात सोयाबीन व कापसाचा पेरा मोठ्या प्रमाणात वाढण्याची शक्यता आहे. शेतकऱ्यांच्या मागणीनुसार कपाशीच्या काही वाणांचा पुरवठा करण्याची मागणी ही पालकमंत्र्यांनी निवेदनाद्वारे केली.