Parbhani News : राज्य पुरस्कृत एकात्मिक सोयाबीन व इतर तेलबिया उत्पादकता वाढ, मूल्यसाखळी विकास यासाठी विशेष कृती योजनेअंतर्गत येत्या तीन वर्षांसाठी परभणी जिल्ह्यात १४ शेतकरी उत्पादक कंपन्या स्थापन करण्याचे उद्दिष्ट आहे. त्यासाठी १ लाख रुपये अनुदानाची तरतूद आहे, अशी माहिती जिल्हा अधीक्षक कृषी अधिकारी रवी हरणे यांनी दिली.

कंपनीच्या पायाभूत सुविधा निर्मितीसाठी त्यात गोदाम बांधकामासाठी खर्चाच्या ५० टक्के किंवा किमान २५ लाख रुपये, क्लीनिंग व ग्रेडिंग युनिटसाठी खर्चाच्या ५० टक्के किंवा किमान ९ लाख रुपये, सायलोसाठी खर्चाच्या ५० टक्के किंवा किमान ७५ लाख रुपये अनुदानाची तरतूद आहे.

शेतकरी उत्पादक कंपन्यांच्या मूल्यसाखळी बळकटीकरणासाठी प्रोत्साहनपर १ लाख रुपये अनुदान आहे. बीज प्रक्रिया युनिटसाठी खर्चाच्या ५० टक्के किंवा ५० हजार रुपये अनुदानाची तरतूद आहे.

शेतकऱ्यांच्या बांधावर जैविक निविष्ठा निर्मिती घटकाअंतर्गत मास्टर लॅब निर्मितीसाठी प्रतिलॅब खर्चाच्या ५० टक्के किंवा किमान १ लाख रुपये, बेसिक लॅब निर्मितीसाठी किमान १५ हजार रुपये, तेलघाणा प्रक्रिया युनिटसाठी किमान २ लाख रुपये तरतूद आहे. या योजनेअंतर्गत विविध घटकांसाठी एकूण ४ कोटी ७ लाख ७२ हजार रुपये एवढी आर्थिक तरतूद आहे.

या योजनेअंतर्गत सोयाबीन पीक प्रात्यक्षिकांसाठी १४० शेतकरी समूहांतर्गत १४ हजार हेक्टरचा लक्ष्यांक आहे. पीक प्रात्यक्षिके, शेतीशाळा व्यतिरिक्त बियाणे साखळी बळकटीकरण, मूल्यसाखळी विकास व प्रचलित योजनांची सांगड हे घटक या बाबींच्या मार्गदर्शक सूचना व लक्ष्यांक प्राप्त झालेला आहे, अशी माहिती हरणे यांनी दिली.

सोयाबीन मूल्यसाखळी योजना तालुकानिहाय उद्दिष्ट (क्षेत्र हेक्टर, आर्थिक तरतूद लाख रुपये)

तालुका शेतकरी उत्पादक कंपनी शेतकरी समूह प्रात्यक्षिक क्षेत्र आर्थिक तरतूद

परभणी १ १० १००० ४४.३००

जिंतूर २ २० २००० ५४.४५०

सेलू २ २० २००० ५३.८००

मानवत २ २० २००० ५४.४५०

पाथरी १ १० १००० ४४.१५०

सोनपेठ २ २० २००० ५४.४५०

गंगाखेड २ -- २००० ५४.९५०

पालम १ १० १००० १९.१५०

पूर्णा १ १० १००० १९.३००