Ahilyanagar News : विधानसभा सार्वत्रिक निवडणूक २०२४ मध्ये सर्वाधिक मतदान केलेल्या जिल्ह्यातील गावांना पुरस्काराने सन्मानित करण्यात आले. यामध्ये शिर्डी विधानसभा मतदार संघातील तरसवाडी या गावाला सर्वाधिक ९५ टक्के मतदानाबद्दल जिल्हास्तरीय पुरस्काराने सन्मानित करण्यात आले. या निवडणुकीत चांगले काम करणाऱ्या अधिकारी-कर्मचाऱ्यांचाही या वेळी गौरव करण्यात आला.

लोकसभा निवडणुकीत सर्वाधिक मतदान करणाऱ्या गावांचा तसेच प्रक्रियेत काम करणाऱ्या अधिकारी कर्मचारी व विद्यालयाचाही गौरव करण्याचा निर्णय जिल्हा प्रशासनाने घेतला होता. त्यानुसार शनिवारी (ता. २५) राष्ट्रीय मतदार दिनानिमित्त झालेल्या कार्यक्रमात गौरव सोहळा झाला. त्यात विधानसभा सार्वत्रिक निवडणुकीत उत्कृष्ट काम करणाऱ्या अधिकाऱ्यांचा गौरव करण्यात आला.

निवडणूक निर्णय अधिकारी सुधीर पाटील, अरुण उंडे, सहायक निवडणूक निर्णय अधिकारी संजय शिंदे, मिलिंद वाघ, गट शिक्षणाधिकारी बाबूराव जाधव, माध्यम प्रमाणीकरण व सनियंत्रण समितीचे सदस्य सचिव डॉ. किरण मोघे, सदस्य महेश देशपांडे, आनंद विद्यालयाच्या मुख्याध्यापिका शारदा पोखरकर, मतदारदूत डॉ. अमोल बागुल, सखाराम मेहेत्रे विद्यालयाच्या शिक्षिका मनीषा कदम, मतदान केंद्रस्तरीय पर्यवेक्षक संजय शिंदे, प्रशांत सुरसे व नंदकुमार नेमाणे यांचा गौरव करण्यात आला.

विधानसभा निवडणुकीत नवमतदार नोंदणी आणि स्वीप उपक्रमात चांगली कामगिरी करणाऱ्या संगमनेर येथील संगमनेर नगरपालिका कला, दामोदर जगन्नाथ मालपाणी वाणिज्य आणि बी. एन. सारडा महाविद्यालय, पद्मश्री डॉ. विठ्ठलराव विखे पाटील महाविद्यालय, लोणी, एस. एस. जी. एम. कॉलेज, कोपरगाव, रा. ब. नारायणराव बोरावके कॉलेज, श्रीरामपूर, कला, वाणिज्य व विज्ञान महाविद्यालय, सोनई, बाळासाहेब भारदे महाविद्यालय, शेवगाव, लोकनेते रामदास पाटील धुमाळ कला, वाणिज्य व शास्त्र महाविद्यालय, राहुरी, न्यू आर्ट्स, कॉमर्स आणि सायन्स महाविद्यालय, पारनेर, न्यू आर्ट्स, कॉमर्स आणि सायन्स महाविद्यालय, अहिल्यानगर, श्री छत्रपती शिवाजी महाविद्यालय, श्रीगोंदा, या महाविद्यालयांचा गौरव करण्यात आला.

गावे सन्मानित

तरसवाडी व खडकेवाके (शिर्डी) घाटघर (अकोले) गोडसेवाडी (संगमनेर), हिंगणी (कोपरगाव), दिघी (श्रीरामपूर), मुरुमे (नेवासा), विजयपूर (शेवगाव-पाथर्डी), मल्हारवाडी (राहुरी), गाडीलगाव (पारनेर), बोल्हेगाव (अहिल्यानगर शहर), गार (श्रीगोंदा), कोरेगाव (कर्जत-जामखेड).