Akola News : डॉ. पंजाबराव देशमुख यांच्या जयंतीनिमित्त येथे कृषी विद्यापीठात आयोजित राज्यस्तरीय ॲग्रोटेक २०२४ ला शेतकरी, नागरिकांची चांगली पसंती मिळाली. पहिल्या दोन दिवसांत या प्रदर्शनात मोठी गर्दी झाल्याचे दिसून आले. प्रामुख्याने नवेतंत्रज्ञान, पशुधन, पुष्पप्रदर्शन हे आकर्षण बनलेले आहे. रविवारी (ता. २९) या प्रदर्शनाचा शेवटचा दिवस असून, गर्दी उच्चांक गाठण्याची शक्यता वर्तविली जात आहे.

या प्रदर्शनामध्ये फळबाग, भाजीपाला, फुलशेती व वनौषधी, कापूस, ज्वारी, गहू, कडधान्य, तेलबिया, पाणलोट विकास, पशू संवर्धन व दुग्ध व्यवसाय, कृषी अभियांत्रिकी व अवजारे इत्यादी विभागांसोबतच कृषी विभागाचे जलसंधारण मॉडेल, नैसर्गिक शेती मॉडेल, केव्हीकेच्या दालनात सघन कापूस लागवड ते प्रक्रीयेपर्यंतच्या बाबी प्रदर्शित करण्यात आल्या आहेत.

प्रदर्शनात कृषी संलग्नित व्यवसाय व शेतीपूरक जोडधंदे तसेच कृषिमाल प्रक्रिया उद्योगाविषयीची दालनेसुद्धा आकर्षणाचा केंद्रबिंदू बनलेले आहेत. गट शेती, स्वयंसाह्यता बचत गटांच्या यशोगाथा, महिला बचत गटांनी उत्पादित केलेले कृषी उत्पादने, शेतकऱ्यांनी तयार केलेले नावीन्यपूर्ण कृषी निविष्ठांची दालनेही गर्दी खेचत आहेत.

पुष्पप्रदर्शन लक्षवेधी

विद्यापीठाच्या पुष्पशास्त्र व प्रांगण उद्यान विभागाद्वारे आयोजित करण्यात आलेली पुष्प प्रदर्शनी या वर्षीच्या ॲग्रोटेक कृषी प्रदर्शनाचे प्रमुख आकर्षण ठरली आहे. उद्यानविद्या विभागामार्फत विकसित करण्यात आलेल्या विविध फळपिकांचे वाण, भाजीवर्गीय पिकांचे वाण तसेच विविध फळांद्वारे तयार करण्यात आलेले प्रक्रियायुक्त पदार्थ शेतकरी तसेच विद्यार्थ्यांचे आकर्षण ठरत आहे.

वनविद्या महाविद्यालयाच्या दालनामध्ये वनशेती सोबतच अखिल भारतीय समन्वय कृषी वनशेती संशोधन प्रकल्प यांच्यामार्फत विविध जातींचे बांबू प्रदर्शित करण्यात आले आहेत. नव्याने विस्तारत असलेल्या खजूर या व्यावसायिक पिकाच्या लागवडीबद्दल माहिती शेतकऱ्यांना देण्यात येत आहे.

कृषी पद्धती व पर्यावरण केंद्रामध्ये नैसर्गिक शेतीचे मॉडेल साकारण्यात आले आहे. वनस्पती रोगशास्त्र विभागाच्या दालनामध्ये विविध जैविक औषधे, बुरशीनाशके प्रदर्शित करण्यात आले असून विक्रीकरिता उपलब्ध केलेली आहेत. मृद्‍ विज्ञान विभाग यांच्या दालनामध्ये विभागाद्वारे विकसित केलेले द्रवरूप खत प्रदर्शित करण्यास आले असून त्याबाबतच्या माहितीसह विक्रीस उपलब्ध करून दिलेली आहे.

कीटकशास्त्र विभागाच्या दालनामध्ये रेशीम निर्मिती सोबतच फेरोमेन ट्रॅपबद्दल माहिती देण्यात येत आहे. महात्मा फुले कृषी विद्यापीठ राहुरीच्या दालनामध्ये विद्यापीठांनी विकसित केलेले उसाचे वाण, भाजीवर्गीय पिके व ड्रोन तंत्रज्ञानाबद्दल माहिती देण्यात येत आहे.