नाशिक : प्रशिक्षित कृषी निविष्ठा विक्रेत्यांकडून कृषी तंत्रज्ञानाचा प्रसार, गुणवत्तापूर्ण बियाणे, खते, कीटकनाशके यांचा पुरवठा व योग्य कृषिविषयक मार्गदर्शन करा, शेतकऱ्यांची सेवा करा, असे प्रतिपादन कृषिमंत्री ॲड. माणिकराव कोकाटे यांनी केले.

प्रादेशिक कृषी विस्तार व्यवस्थापन प्रशिक्षण संस्था नाशिक रामेती येथे आयोजित राष्ट्रीय कृषी विस्तार व्यवस्थापन संस्था (मॅनेज, हैदराबाद),वसंतराव नाईक राज्य कृषी विस्तार व्यवस्थापन प्रशिक्षण संस्था (वनामती, नागपूर) व कृषी तंत्रज्ञान व्यवस्थापन यंत्रणा (आत्मा) नाशिक पुरस्कृत कृषी निविष्ठा विक्रेत्यांसाठी कृषी विस्तार सेवा पदविका अभ्यासक्रम प्रमाणपत्र वितरण समारंभात कोकाटे बोलत होते.

या वेळी विभागीय कृषी सहसंचालक सुभाष काटकर, महाराष्ट्र राज्य द्राक्ष बागायतदार संघाचे अध्यक्ष कैलास भोसले, निवृत्त परिवहन अधिकारी प्रकाश बनकर, जिल्हा अधीक्षक कृषी अधिकारी तथा रामेतीचे प्राचार्य शिवाजीराव आमले, ‘स्मार्ट’प्रकल्प नाशिकचे विभागीय नोडल अधिकारी सुनील वानखेडे,‘आत्मा’चे प्रकल्प संचालक अभिमन्यू काशिद, साहेबराव क्षीरसागर, अरूण आहेर उपस्थित होते.

कृषिमंत्री कोकाटे म्हणाले, की ४८ आठवडे कालवाधीचा पदविका अभ्यासक्रम पूर्ण केलेल्या प्रशिक्षणार्थीना कृषी निविष्ठा विक्री व्यवसायातील तांत्रिक कौशल्ये आणि व्यवस्थापन क्षमता आत्मसात झाली आहे. येणाऱ्या काळात उत्कृष्ट कृषी सेवा देणाऱ्या कृषी सेवा केंद्रांची स्पर्धेतून निवड केली जाणार असून त्यांचाही शासनस्तरावर सन्मान केला जाणार आहे. ‘एआय’ तंत्रज्ञानाच्या माध्यमातून कृषी क्षेत्राचा विकासासाठी नवीन प्रयोग व योजना कार्यान्वित करण्यासाठी राज्य शासन प्रयत्नशील आहे.

उपस्थित तुकडी ३ व ४ च्या एकूण ८० प्रशिक्षित कृषी निविष्ठा विक्रेत्यांना कोकाटे यांच्या हस्ते प्रमाणपत्र देवून सन्मानित करण्यात आले. कृषी विषयांतील पदवीधर नसलेल्या कृषी निविष्ठा विक्री परवानाधारक विक्रेत्यांसाठी डिप्लोमा इन ॲग्रीकल्चर एक्सटेन्शन सर्व्हिसेस फॉर इनपूट डिलर्स (DAESI) अभ्यासक्रम राबविला जातो. किमान दहावी उत्तीर्ण असलेल्या कृषी निविष्ठा विक्रीचा परवाना असलेल्या कृषी निविष्ठा विक्रेत्यांना या अभ्यासक्रमासाठी प्रवेश घेता येतो.
-प्राचार्य शिवाजीराव आमले