Dhule News: विधान परिषदेत कामकाज सुरू असताना मोबाइलवर रमी खेळतानाची चित्रफीत व्हायरल झाल्याने चर्चेत आलेले राज्याचे कृषिमंत्री माणिकराव कोकाटे यांना जिल्ह्यात ठाकरे व शरद पवार गटाच्या कार्यकर्त्यांनी शुक्रवारी (ता. २५) काळे झेंडे दाखविले. वाढता रोष लक्षात घेता कोकाटे खानदेश दौरा अर्धवट सोडून माघारी परतले.

विधिमंडळाच्या अधिवेशनादरम्यान सभागृहात मोबाइलवर ऑनलाइन रमी खेळताना दिसल्याने त्यांच्यावर टीकेची झोड उठली आहे. या प्रकारानंतर विरोधकांनी त्यांच्या राजीनाम्याची जोरदार मागणी केली असून, मुख्यमंत्री देवेंद्र फडणवीस यांनीही श्री. कोकाटे यांच्या वर्तनावर नाराजी व्यक्त केली आहे.

त्यातच माणिकराव कोकाटे हे धुळे जिल्ह्याच्या दौऱ्यावर असताना त्यांच्या विरोधात राष्ट्रवादी (शरद पवार गट) आणि शिवसेना (ठाकरे गट) पक्ष आक्रमक झाले. मंत्री कोकाटे मुक्कामी थांबलेल्या हॉटेलबाहेर कार्यकर्त्यांनी पत्ते व काळे झेंडे दाखवले. शिंदखेडा तालुक्यातील एका खासगी पेट्रोल पंपाच्या उद्‍घाटन कार्यक्रमासाठी कोकाटे आले होते. या वेळी त्यांना दुष्काळ, कांदा दरावरून प्रश्‍न विचारण्यात आले.

शिवसेना ठाकरे गटाकडून हॉटेलबाहेर काळे झेंडे दाखवत निषेध व्यक्त करण्यात आला. ‘शेतकऱ्यांनो शेती सोडा, रमी खेळा ह.भ.प. माणिक कोकाटे, शेतकऱ्यांनो रमी खेळा, लाखो जिंका, ऑनलाइन रमी,’ अशा आशयाचे बॅनर्स झळकावण्यात आले. यामुळे परिसरात पोलिस बंदोबस्त तैनात करण्यात आला. धुळे येथून कोकाटे चोपडा (जि. जळगाव) येथे पदाधिकारी मेळाव्यात उपस्थित राहणार होते. पण त्यांनी दौरा अपूर्ण सोडला. आणि ते माघारी परतले.