Dharashiv News : कृषी सेवा केंद्र दुकानातील औषधांचे सॅम्पल न घेण्यासाठी, वर्षभराच्या हंगामामध्ये कारवाई न करता सहकार्य करावे यासाठी १० हजाराची लाच मागणारा पंचायत समितीचा विस्तार अधिकारी (कृषी) धाराशिवच्या लाचलूचपत प्रतिबंधक विभागाच्या सापळ्यात अडकला आहे.

लाचलुचपत प्रतिबंधक विभागाच्या माहितीनुसार, याप्रकरणी लाच मागणी ६ सप्टेंबर रोजी करण्यात आली होती. बुधवारी (ता. ४) ती लाचलुचपत प्रतिबंधक विभागाच्या सापळ्यात पंचासमक्ष स्वीकारली आहे. पाटोदा (जि. बीड) पंचायत समितीचे विस्तार अधिकारी (कृषी) जयेश मुकुंद भुतपल्ले असे लाच स्वीकारणाऱ्या अधिकाऱ्याचे नाव आहे.

तक्रारदार यांचे कृषी सेवा केंद्र दुकानातील औषधांचे सॅम्पल न घेण्यासाठी, वर्षभराच्या हंगामामध्ये कारवाई न करता सहकार्य करावे यासाठी लोकसेवक यांनी दहा हजार रुपये लाच रकमेची मागणी केली होती.

बुधवारी (ता. ४) दहा हजाराची लाच रक्कम पंचांसमक्ष स्वतः स्वीकारली. त्यावरून लोकसेवक यांना ताब्यात घेण्यात आले आहे. पाटोदा, जि. बीड पोलिस ठाण्यामध्ये गुन्हा

दाखल करण्याची प्रक्रिया चालू होती. सापळा अधिकारी पोलिस निरीक्षक नानासाहेब कदम यांच्या नेतृत्वाखाली सापळा पथकाने कारवाई केली. पथकामध्ये पोलीस अंमलदार विशाल डोके, विष्णू बेळे, सिद्धेशर तावस्कर, अविनाश आचार्य, दत्तात्रेय करडे यांचा समावेश आहे.