Parbhani News : वसंतराव नाईक मराठवाडा कृषी विद्यापीठ व मांजरी (पुणे) येथील वसंतदादा शुगर इन्स्टिट्यूट (व्हीएसआय) यांच्यात ऊस पिकातील संशोधन, शिक्षण आणि विस्‍तार याकरिता गुरुवारी (ता. ८) परभणी येथे सामंजस्य करार करण्‍यात आला.

कुलगुरू डॉ. इंद्र मणी यांच्‍या अध्‍यक्षतेखाली आयोजित बैठकीत संशोधन संचालक डॉ. दत्तप्रसाद वासकर, ‘व्हीएसआय’चे शास्‍त्रज्ञ डॉ. ए. डी. कडलग, डॉ. एस. जी.दळवी आदी उपस्थित होते.

डॉ. इंद्र मणी म्‍हणाले, ‘‘मराठवाडा विभागातील ऊस शेती संशोधनास चालना मिळेल. भविष्‍यात साखर उद्योग क्षेत्रात विद्यार्थ्‍यांना कौशल्‍य विकासाकरिता ऊस शेती, साखर कारखाना, मूल्यवर्धित पदार्थ निर्मिती, अल्‍कोहोल निर्मिती तंत्रज्ञान, बॉयो फ्यूएल आदींवर आधारित अभ्‍यासक्रम सुरू करण्‍यात येतील.

शेतकऱ्यांना सुधारित ऊस लागवडीचे प्रशिक्षण आयोजित करण्‍यात येईल. या करारामुळे मराठवाड्यातील ऊस संशोधनास व पदव्‍युत्तर विद्यार्थ्‍यांना संशोधनाकरिता वसंतदादा शुगर इन्स्टिट्यूट संस्‍थेमधील विविध सोईसुविधांचा फायदा घेता येईल.’’

या करारावर ‘व्हीएसआय’चे महासंचालक संभाजी कडू-पाटील, शास्‍त्रज्ञ डॉ. ए. डी. कडलग, डॉ. एस. जी. दळवी, तर डॉ. दत्तप्रसाद वासकर, डॉ. गोदावरी पवार, डॉ. मदन पेंडके यांनी स्‍वाक्षरी केल्‍या. बैठकीस नियंत्रक प्रवीण निर्मल, प्राचार्य डॉ. सय्यद इस्माईल, डॉ. राजेश क्षीरसागर, डॉ. व्ही. एस. खंदारे, विभाग प्रमुख, संशोधक उपस्थित होते.