Ratnagiri News : भात जाती संशोधनाला चालना देण्यासाठी फिलीपाईन्स येथील आंतरराष्ट्रीय भात संशोधन संस्था (ईरी) आणि डॉ. बाळासाहेब सावंत कोकण कृषी विद्यापीठ यांच्या दरम्यान नुकताच सामंजस्य करार करण्यात आला.

फिलीपाईन्स येथे विद्यापीठाचे कुलगुरू डॉ. संजय भावे आणि आंतरराष्ट्रीय भात संशोधन संस्थेचे महानिर्देशक डॉ. अजय कोहली यांनी सामंजस्य करारावर सह्या केल्या.

१५ ते २० ऑक्टोबर या कालावधीमध्ये आयोजित सहाव्या आंतरराष्ट्रीय भात परिषदेमध्ये डॉ. भावे आणि कर्जत येथील प्रादेशिक कृषी संशोधन केंद्रातील भात पैदासकार डॉ. भरत वाघमोडे सहभागी झाले होते.

त्यावेळी हा सामंजस्य करार करण्यात आला. या करारानुसार, भाताच्या विविध स्थानिक जातींचे संकलन, वैशिष्ट सुधारणा त्याचबरोबर अधिक उत्पन्न देणाऱ्या जाती, पाण्याचा अति ताण सहन करणाऱ्या जाती तसेच विविध कीड, रोग प्रतिकारक जातींवर संशोधन करण्यात येईल.

जलद संकरीकरण, कृत्रिम बुद्धिमत्ता यासारख्या घटकांचा संशोधनात समावेश करण्यात येणार आहे. विद्यापीठातील भात संशोधक, आचार्य पदव्युत्तर विद्यार्थ्यांना फिलीपाईन्स येथे संशोधन करण्याची संधी निर्माण झाली आहे.

या करारामुळे दोन्ही संस्थांमध्ये तंत्रज्ञानाची देवाणघेवाण, शैक्षणिक आणि संशोधनाबाबत विविध प्रकल्प राबविणे शक्य होईल. या वेळी आंतरराष्ट्रीय भात संशोधन संस्थेतील तज्ज्ञ डॉ. उमाशंकर सिंग, डॉ. संकल्प भोसले, दक्षिण आफ्रिकेचे संशोधन समन्वयक डॉ. अजय पंचभाई आदी उपस्थित होते.