Latur/Dharashiv News : दोन्ही जिल्ह्यांच्या काही भागांत चार दिवसांच्या विश्रांतीनंतर पावसाने बुधवारी (ता. ४) पावसाने पुन्हा हजेरी लावली. गुरुवारीही (ता. पाच) ढगाळ वातावरण असल्याने शेतकऱ्यांनी खरिपातील राहिलेल्या मशागतीच्या कामांना वेग दिला तरी सलग पावसाची धास्ती शेतकऱ्यांमध्ये आहे.
आभाळाकडे पाहूनच शेतकऱ्यांनी पेरणीपूर्व मशागतीच्या कामाचे नियोजन सुरू केले आहे. दरम्यान, गुरुवारीही पावसाची दाट शक्यता व्यक्त केली जात होती. काही भागात शेतकऱ्यांनी पेरण्यांना सुरुवात केली असली तरी बहुतांश शेतकरी मृग नक्षत्राच्या पावसानंतरच पेरण्या करण्याच्या मानसिकतेत आहेत.
यंदा १५ मेपासूनच पावसाळा सुरू झाल्याचे चित्र दोन्ही जिल्ह्यांत आहे. लवकर आलेल्या पावसामुळे खरिपाच्या मशागतीची कामे खोळंबली आहे. मशागतीच्या कामांसाठी पाऊस सवड देईल का नाही, असा प्रश्न उपस्थित होत असतानाच चार दिवसांपूर्वी पावसाने खंड दिला. हा खंड दोन आठवडे राहील, अशी शक्यता वर्तविण्यात येत होती. यामुळे वापसा झालेल्या जमिनीत शेतकऱ्यांनी वेगाने मशागतीची कामे हाती घेतली होती.
काही जमिनीतील मशागतींच्या कामासाठी अजूनही शेतकऱ्यांना वापसा होण्याची प्रतीक्षा आहे. पावसाने काही भागात बंधारे फुटले असून त्याची डागडुजी शेतकरी करत आहेत. उन्हाळी भुईमूग व रब्बी ज्वारीच्या काढणीतही पावसाचा व्यत्यय आला आहे. मशागतीची कामे तातडीने उरकण्यावर शेतकऱ्यांचा भर असून मृग नक्षत्रातील पाऊस पडल्यानंतरच पेरण्या हाती घेण्याची मानसिकता शेतकऱ्यांची आहे. तरीही काही भागात शेतकऱ्यांनी धाडस करून पेरण्यांना सुरुवात केली आहे.
लवकर पेरण्या केल्यानंतर ऑक्टोबर व नोव्हेंबरमध्ये परतीच्या पावसाच्या तावडीतून सोयाबीन वाचेल, असे शेतकऱ्यांना वाटत आहे. परतीचा पाऊस येण्यापूर्वीच सोयाबीन काढणी उरकेल, या आशेनेही शेतकऱ्यांनी पेरण्यांना सुरुवात केली आहे.
यातच बुधवारी वातावरणात बदल होऊन पुन्हा पावसाचे चित्र निर्माण झाले आहे. काही भागात हजेरी लावली व गुरुवारी सकाळपासून ढगाळ वातावरण असल्याने पाऊस मशागतीच्या उरल्या सुरल्या कामातही पाऊस अडसर आणण्याची शक्यतेने शेतकऱ्यांनी मशागतीच्या कामांना वेग दिला आहे.
मोगडा अथवा रोटरने राने पेरणीयोग्य करणे आवश्यक आहे. रानावर तसाच केरकचरा राहिल्यास पेरणी करताना तिफनीखाली कैचण अडकून बियाणे बरोबर पडत नाही. तसेच पुढे बियाणे उगवण झाल्यानंतर कोळपणी करताना कचरा अडकून मोडावर माती पडते त्यामुळे केरकचरा स्वच्छ करणे गरजेचे आहे.— बालाजी पाटील, शेतकरी
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.