Dharashiv News : खरीप हंगाम जवळ आलेला असताना खत, बी बियाणे व कीटकनाशके विक्रीमध्ये गडबड करणाऱ्या १९ कृषी सेवा केंद्रांना कृषी विभागाने चांगलाच दणका दिला आहे. यात जिल्ह्यातील दोन कृषी सेवा केंद्राचे परवाने कायमस्वरूपी रद्द, बारा कृषी सेवा केंद्राचे परवाने निलंबित व पाच केंद्रांना सक्त ताकीद देण्यात आल्याची माहिती जिल्हा अधीक्षक कृषी अधिकारी राजेंद्र माने यांनी दिली. कृषी विभागाच्या कारवाईमुळे विक्रेत्यांमध्ये खळबळ उडाली आहे.

तपासणीत ई-पॉस मशिनप्रमाणे : कृषी निविष्ठांचा साठ्यात तफावत आढळणे, परवान्यात समाविष्ट स्रोताव्यतिरिक्त इतर निविष्ठाची खरेदी विक्री करणे, साठा रजिस्टरला नोंद नसणे, विहित नमुन्यात पावती न देणे आदी अनियमितता आढळून आली आहे. यात १९ कृषी सेवा केंद्रांना देण्यात आलेल्या विविध प्रकारच्या ३५ परवान्यांबाबत कारवाई केली आहे.

कळंब तालुक्यातील तीन व लोहारा तालुक्यातील तीन केंद्रांचे परवाने कायमस्वरूपी रद्द केले. भूम तालुक्यातील १७, धाराशिव तालुक्यातील चार, तुळजापूर तालुक्यातील एक तर कळंबमधील दोन केंद्रांचे परवाने निलंबित केले. तर धाराशिव तालुक्यातील दोन, परंडा, तुळजापूर व वाशी तालुक्यांतील प्रत्येकी एका केंद्रचालकांना ताकीद दिली.

रोहन अॅग्रो सर्व्हिसेस (पाथ्रुड), आधार एंटरप्रायजेस अॅण्ड अॅग्रो कन्सल्टन्सी (धाराशिव), शेतकरी अॅग्रो एजन्सी (येडशी), महालक्ष्मी अॅग्रो एजन्सी (येडशी), दत्त कृषी सेवा केंद्र (इंदिरानगर, धाराशिव), तुळजाभवानी अॅग्रो एजन्सी (येरमाळा), कृषिधन अॅग्रो एजन्सीज (वाशी), तिरुमला कृषी सेवा केंद्र (येडशी), आलप्रभू कृषी सेवा केंद्र (भूम), प्रतिभा कृषी सेवा केंद्र (पाथ्रुड), साई अॅग्रो एजन्सीज (भूम), (सोन्नेवाडी), वैष्णवी कृषी सेवा केंद्र (दहिफळ), न्यू साईराज अॅग्रो एजन्सीज (परंडा), अनुजा कृषी सेवा केंद्र (पाथ्रुड), भोसले कृषी सेवा केंद्र (जळकोट), शुभम अॅग्रोवन मार्ट (लोहारा), अंजनी अॅग्रो एजन्सी (देवळाली) व जयकिसान कृषी सेवा केंद्र (तामलवाडी).