Ahilynagar News : भारतीय संस्कृतीमध्ये मातीला खूप महत्त्व आहे. भरमसाठ रासायनिक खतांच्या वापरामुळे जमिनीची जडणघडण बिघडली आहे. त्यामुळे जमिनीतील पिकांच्या वाढीसाठी आवश्यक असलेले जिवाणू नष्ट होऊन पिकांची उत्पादकता कमी झाली आहे.

जमिनीचा सर्वांगीण विकास होण्याकरिता व जमिनीची उत्पादनक्षमता वाढविण्यासाठी एकत्रितपणे प्रयत्न करणे गरजेचे, असल्याचे मत महात्मा फुले कृषी विद्यापीठातीलमृद विज्ञान विभागाचे विभाग प्रमुख डॉ. भीमराव कांबळे यांनी केले.

महात्मा फुले कृषी विद्यापीठाच्या मृद विज्ञान विभाग, कृषी विभाग, यांच्यातर्फे कुलगुरु डॉ. पी. जी. पाटील यांच्या मार्गदर्शनाखाली सडे (ता. राहुरी) येथे प्रमोद धोंडे या शेतकऱ्याच्या शेतावर जागतिक मृदा दिन झाला.

डॉ. भीमराव कांबळे यांच्यासह आंतरविद्या जलसिंचन विभाग प्रमुख डॉ. विजय पाटील, मृदविज्ञान विभागाचे वरिष्ठ शास्त्रज्ञ डॉ. अनिल दुरगुडे, सहयोगी प्राध्यापक डॉ. रितू ठाकरे, डॉ. श्रीगणेश शेळके, डॉ. देविदास खेडकर, डॉ. संजय तोडमल, डॉ. सुभाष घोडके, जिल्हा मृद सर्वेक्षण व मृद चाचणी अधिकारी श्रीमती तागड, श्रीरामपूरचे उपविभागीय कृषी अधिकारी प्रवीण गोसावी, वरिष्ठ संशोधन सहाय्यक दादासाहेब धोंडे यांच्यासह पदाधिकारी उपस्थित होते.

डॉ. कांबळे म्हणाले, की जमिनीचा पोत सुधारण्यासाठी प्रथम माती व पाणी करून खते देणे गरजेचे आहे. नापिक जमीन सुपीक करण्यासाठी सर्वांनी प्रयत्न करणे गरजेचे आहे. डॉ. दुरगुडे म्हणाले, की माती, पाणी, हवा ही नैसर्गिक संसाधने असून त्यातील माती ही आपल्या जीवनाचा आधारस्तंभ आहे. मातीमधूनच आपल्याला पाणी तसेच विविध अन्नद्रव्य मिळतात.

दरवर्षी पावसाळ्यात प्रती हेक्टर १६ टन माती वाहून जाते. या वाहून जाणाऱ्या पाण्याबरोबर जमिनीतील खते, जिवाणू व कर्बाचा समावेश होतो. आशुतोष धोंडे, बाळासाहेब गवते, शिवाजी धामोरे, पंडित साळुंखे, हरून पठाण, प्रमोद धोंडे या शेतकऱ्यांना मृदा आरोग्य पत्रिकांचे वाटप करण्यात आले. प्रकाश धोंडे यांनी आभार मानले.