Latest Agriculture News : अवर्षणस्थितीच्या पार्श्वभूमीवर सरकारने ओलिताखालील शेतीसाठी ग्रामपंचायत स्तरावरून पंचायत समितीकडे विंधन विहिसाठी प्राप्त झालेल्या ९५० प्रस्तावापैकी १८७ प्रस्ताव मंजूर करण्यात आले आहेत.

महात्मा गांधी ग्रामीण रोजगार हमी योजनेअंतर्गत ग्रामीण भागात वैयक्तिक लाभाच्या महत्वपूर्ण योजनेचा फायदा होत आहे. मात्र त्यासाठी करावी लागणारी पायपीठ, मानसिक व आर्थिक झटका देणारी ठरत असल्याची चर्चा शेतकऱ्यांमध्ये सुरु आहे.

उमरगा पंचायत समितीत प्रशासकाचा कार्यकाळ सुरु झाल्यापासून कामात पारदर्शकता दिसून येत नाही. सिंचन विहिरी, शेवगा लागवड, जनावरांचा गोठा या वैयक्तिक लाभाच्या प्रस्तावावरील धुळ तत्कालीन प्रशासकाच्या कार्यकाळात बाजुला केलीजात नव्हती.

मात्र शेवटच्या टप्प्यात काही मोजक्या प्रस्तावाला मंजूरी दिली होती. नव्याने रूजू झालेले गटविकास अधिकारी तथा प्रशासक प्रशांतसिंह मरोड यांनी रुजू झाल्यानंतर जून २०२३ मध्ये ‘पेन्डन्सी’ प्रस्तावाचा निपटारा सुरू केल्याने लाभार्थ्यांनी समाधान व्यक्त केले होते. त्यानंतरही वैयक्तिक लाभाच्या प्रस्ताव मंजुरीचे काम सुरू आहे.