Parbhani News : परभणी जिल्ह्यातील ७ लघू तलाव कोरडे पडले असून ८ लघू तलावांतील पाणीसाठा जोत्याखाली गेला आहे. दोन मध्यम प्रकल्पांमध्ये सरासरी १७ टक्के पाणीसाठा शिल्लक होता. जलस्रोत आटल्यामुळे जिल्ह्यातील अनेक लोकवस्त्यावरील पाणी टंचाईचे संकट गहिरे झाले आहे.

उपसा तसेच तापमानातील वाढ, बाष्पीभवनाचा वेग वाढल्यामुळे लघू तसेच मध्यम प्रकल्पांतील पाणीसाठ्यात मोठी घट झाली आहे. जायकवाडी पाटबंधारे विभाग अंतर्गंत परभणी जिल्ह्यातील २१ व जालना जिल्ह्यातील लघू सिंचन प्रकल्पांची पूर्ण जल क्षमता सरासरी ४५.८२७ दलघमी, तर उपयुक्त पाणीसाठा क्षमता ४२.२०५ दलघमी आहे. पाटबंधारे विभागातर्फे गुरुवारी (ता. १५) घेण्यात आलेल्या पाणी पातळीच्या नोंदीनुसार जिल्ह्यातील लघू प्रकल्पांमध्ये सरासरी ४.१७७ दलघमीनुसार १० टक्के तर दोन मध्यम प्रकल्पांमध्ये सरासरी ८.८२८ दलघमीनुसार १७ टक्के पाणीसाठा उपलब्ध होता.

दोन मध्यम प्रकल्पांत १७ टक्के पाणीसाठा...

करपरा मध्यम प्रकल्पाची पूर्ण जल क्षमता २८.८२० दलमघी असून त्यापैकी उपयुक्त साठा क्षमता २४.९०० दलघमी आहे. मासोळी मध्यम प्रकल्पाची पूर्ण जल क्षमता ३४.०८५ दलघमी असून त्यापैकी उपयुक्त साठा २७.१४१ दलघमी आहे. जायकवाडी पाटबंधारे विभागातर्फे गुरुवारी (ता. १५) घेण्यात आलेल्या पाणी पातळीच्या नोंदीनुसार करपरा प्रकल्पात २.८५४ दलघमी नुसार ११ टक्के तर मासोळी मध्यम प्रकल्पांमध्ये ५.९७४ दलघमी नुसार २२ टक्के उपयुक्त पाणीसाठा होता.

७ लघू तलाव कोरडे...

गुरुवारी (ता. १५) घेण्यात आलेल्या पाणी पातळीच्या नोंदीनुसार जिंतूर तालुक्यातील जोगवाडा, बेलखेडा, चारठाणा, चिंचोली, आडगाव, केहाळ, देवगाव हे ७ लघु तलाव कोरडे पडले आहेत तर पेडगाव, आंबेगाव, नखातवाडी, टाकळगाव, कोद्री, भोसी, कवड, मांडवी, या ८ लघू तलावातील पाणीसाठा जोत्याखाली गेला आहे.

जिंतूर तालुक्यातील वडाळी लघु तलावात १४ टक्के, दहेगाव लघु तलावात २ टक्के, पाडाळी लघु तलावात १० टक्के पाणीसाठा होता. झरी लघु तलावामध्ये ७९ टक्के, तांदुळवाडी लघु तलावात ४ टक्के, राणीसावरगाव लघु तलावात १२ टक्के,पिंपळदरी लघु तलावामध्ये ४० टक्के पाणीसाठा होता. २०२४ मध्ये १५ मे रोजी लघु प्रकल्पांमध्ये सरासरी १.३३३ दलघमी (३ टक्के) पाणीसाठा होता. त्यावेळी १२ लघु तलाव कोरडे पडले होते तर ७ लघु प्रकल्पांतील पाणीसाठा जोत्याखाली गेला होता.