Chh. Sambhajinagar News : जिल्ह्यात आधारभूत दरानुसार महाराष्ट्र राज्य सहकार पणन महासंघ व राष्ट्रीय सहकारी ग्राहक महासंघ (एनसीसीएफ) मार्फत तूर खरेदीसाठी ११ खरेदी केंद्र कार्यान्वित करण्यात आले आहेत. त्यावरून आतापर्यंत ६७ शेतकऱ्यांनी नोंदणी केली आहे.

शेतकऱ्यांनी आपल्या जवळच्या तूर खरेदी केंद्रावर जाऊन आपल्या पिकाची नोंदणी करून शेतमाल विक्रीसाठी खरेदी केंद्रावर न्यावा,असे आवाहन आधीच जिल्हा पणन अधिकारी व्ही.यु.राठोड यांनी केले आहे.

जिल्ह्यात तूर खरेदीसाठी सुरू करण्यात आलेल्या केंद्रामध्ये छत्रपती संभाजीनगर, गंगापूर, वैजापूर, खुलताबाद, कन्नड, सोयगाव, सिल्लोड, फुलंब्री, पाचोड, शिवना, विहामांडवा या ११ तूर खरेदी केंद्राचा समावेश आहे.

तूर खरेदीकरिता शेतकरी नोंदणी २४ जानेवारीपासून करण्यात येत असून प्रत्यक्षात तूर खरेदी १३ फेब्रुवारीपासून सुरु झाली आहे. खरेदी १३ मेपर्यंत सुरु राहणार आहे. शिवाय नोंदणीसाठी ही महिनाभराची मुदतवाढ दिलेली आहे.

आधारभूत किमतीने खरेदी व बाजार दरात अंतर कमी असल्याने नोंदणीकडे शेतकऱ्यांचा कल फारसा नसल्याची स्थिती आहे. त्यामुळेच नोंदणी कमी झाल्याचे दिसत असल्याची माहिती मार्केटिंग फेडरेशनच्या सूत्राने दिली.

जालन्यात १५ केंद्रांवरून ७६९ नोंदणी

जालना जिल्ह्यात महाराष्ट्र स्टेट को-ऑपरेटीव मार्केटिंग फेडरेशनच्या माध्यमातून सुमारे १५ केंद्र तूर खरेदीसाठी सुरू करण्यात आली आहेत. या केंद्रावरून आधारभूत किमतीने तूर खरेदीसाठी ७६९ शेतकऱ्यांनी नोंदणी केली या केंद्रांवरून आधी सोयाबीनची आधारभूत किमतीने खरेदी करण्यात आली होती. खरेदी केलेल्या सोयाबीनची अजूनही गोडाऊन मध्ये साठवणूक सुरूच आहे.