Daund News : दौंड तालुक्यात या वर्षी ६४३९ हेक्टर गव्हाची पेरणी झाली होती. तालुक्यात २७ हजार हेक्टरमध्ये वेगवेगळी पिके घेण्यात आली असून‌, त्यापैकी एकट्या गहू पिकाचा वाटा सरासरी २५ टक्के आहे.

सर्वाधिक ऊस पिकविणारा तालुका म्हणून दौंड तालुका ओळखला जातो. उसाचे पीक गुऱ्हाळ घरावर किंवा कारखान्यावर गेल्यानंतर अतिशय कमी कालावधीमध्ये येणारे पीक म्हणून गहू पिकाकडे पाहिले जाते.

मुळा-मुठा व भीमा नदीच्या पट्ट्यामध्ये सर्वाधिक गावाची लागवड केल्याचे या वर्षी दिसत आहे. दौंड तालुक्यात दरवर्षी सरासरी ५८२१ हेक्टर गहू पिकवला जातो. यंदा दौंड तालुक्यात मोठ्या प्रमाणावर गहू शेती दिसत असली तरी गहू पीक गेल्या वर्षीच्या तुलनेत कमी आहे.

कारण सन २०२२/२३ च्या रब्बीमध्ये उच्चांकी ७५३५ हेक्टर गहू पिकांचे उत्पादन घेण्यात आले होते, असे तालुका कृषी अधिकारी राहुल माने यांनी सांगितले.

बहुंताशी गव्हाच्या ओंबीमध्ये पुरेपूर टपोरा गव्हाचा दाणा भरला आहे. संकरित व आधुनिक बियाण्यांमुळे एका ओंबीमध्ये १०० ते १२० गव्हाचे दाणे भरले आहेत, असे शेतकरी बापूराव कोंडे यांनी सांगितले.