News: राज्य सरकार ‘मुख्यमंत्री माझी लाडकी बहीण’ योजनेतून 50 लाख महिलांना अपात्र ठरविण्याची शक्यता आहे.या योजनेअंतर्गत 21 ते 65 वयोगटातील आणि कौटुंबिक वार्षिक उत्पन्न 2.5 लाखांपेक्षा कमी असणाऱ्या महिलांना दरमहा 1,500 रुपये दिले जातात.परंतु,आता सरकारने उत्पन्न पडताळणी प्रक्रिया सुरू केल्यामुळे वरील महिलांचे अर्ज बाद होऊ शकतात,असे महिला आणि बालविकास मंत्री अदिती तटकरे यांनी स्पष्ट केले.

सरकारने हि योजना 1 जुलै 2024 पासून अंमलात आली.योजनेचा मुख्य उद्देश महिलांना आर्थिक स्वातंत्र्य,आरोग्य आणि पोषण सुधारणा तसेच कुटुंबात निर्णायक भूमिका मजबूत करणे आहे.आतापर्यंत 2 कोटी 63 लाख महिलांनी अर्ज केले, त्यापैकी 2 कोटी 41 लाख महिला पात्र ठरल्या तर 11 लाख अर्जांची पडताळणी बाकी आहे. हि योजना महायुती सरकारच्या निवडणूक यशात महत्त्वाची ठरली.

परंतु, अनेक अपात्र महिलांनी योजनेचा लाभ घेतल्याच्या तक्रारींमुळे पडताळणीला गती देण्यात आली आहे. उत्पन्न 2.5 लाखांपेक्षा जास्त असणे, सरकारी कर्मचारी कुटुंबातील सदस्य असणे, चारचाकी वाहन मालकी किंवा इतर सरकारी योजनांचा लाभ घेणाऱ्या महिलांना अपात्र ठरविण्यात येत आहे. आतापर्यंत 2,289 सरकारी कर्मचाऱ्यांनी लाभ घेतल्याचे उघड झाले असून, त्यांना पैसे मिळणार नाहीत. तसेच, 5.5 लाख महिलांचे अर्ज यापूर्वीच बाद झाले आहेत.पडताळणी प्रक्रियेत आधार कार्ड आणि बँक खाते लिंक नसणे, चुकीची माहिती देणे किंवा इतर योजनांचा लाभ घेणे यांसारखी कारणे आढळली आहेत.

सरकारने यापूर्वी दिलेले पैसे परत घेणार नसल्याचे जाहीर केले आहे, परंतु नवीन हप्ते केवळ पात्र महिलांनाच मिळतील. नागरिकांना ई-केवायसी पूर्ण करण्याचे आणि नियमांचे पालन करण्याचे आवाहन करण्यात आले आहे. ही पडताळणी योजनेच्या पारदर्शकतेसाठी आणि खऱ्या लाभार्थ्यांपर्यंत लाभ पोहोचवण्यासाठी महत्त्वाची आहे, असे सरकारचे म्हणणे आहे.